Atlantikup Avannaamiut unnukkut kulturisiortinneqassapput
Nunatsinni unnuit taartut, issersuaq pinngortitamullu qanilluni inuuneq oqaluttuaqattaannermik ingerlatsinissamut tunngaviulluartuupput. Atlantikup avannaani oqaluttuartarneq pingaartinneqartaqisoq qitiutinneqassaaq Odensemi septembarip arfineq aappaani Atlantikup Avannaamiut unnukkut kulturisiortinneqalerpata.
aggustip 29-at 2007 08:33
Odensemi Kalaallit Illuutaat aaqqissuussiniarpoq Islandimiut peqatigiiffiat, Savalimmiormiut peqatigiiffiat aamma Odensemi kalaallit ilinniagaqartut peqatigiiffiat suleqatigalugit 2007-imi Atlantikup Avannaamiut unnukkut kulturisiornerat – Oqaluttuarnerup Silarsuaa-nik taallugu. Erinarsortartut Aviaaja Lumholt aamma Rasmus Lyberth unnuk taanna ilaatigut aliikkusersuissapput.
Aaqqissuussinermi Odensemi umiarsualivimmi Atlantikup Avannaamiut Illuannik sananissamut pilersaarutit aammattaaq misissuataarneqarsinnaassapput. Illu taanna Savalimmiormiut, Kalaallit Islandimiullu Danmarkimi inuppalaartumik kulturikkullu naapittarfiattut atorneqassaaq.
