Atlantikup avannaamiui tunuarniarlutik sioorasaaripput

Atlantikup Avannaani Suleqatigiit Folketingimi illuatungiliuttunik suleqateqarnertik kipitinniarlugu ullaatungaa siorasaaripput.

Savalimmiuni nunatsinnilu folketingimut ilaasortat piumasaqarput Japan-ip arferup neqaanik nioqquteqarsinnaajumalluni qinnuteqaataa pillugu illuatungiliuttut taasisimanertik utertissagaat, taamaatoqanngippat illuatungiliuttunik teknikkikkut suleqateqarneq kipitinneqassasoq sioorasaarutaalluni.

Cites-ip ataatsimiinererani, ulluni makkunani Bangkokimi pisumi, arfernik tuniniaasinnaanermut Japanimiut siunnersuutaat folketingimi amerlanerussuteqartunit itigarteqqullugu avatangiisinut ministeri Connie Hedegaard piumaffigineqarpoq.

Connie Hedegaard kalaallit savalimmiormiullu arfanniartarnerat pissutigalugu Japanimiut siunnersuutaanut siullermik akuersaarniarsimagaluarpoq, illuatungiliuttulli, ilaatigut socialdemokratit inassuteqarnerisigut itigartitseqataalluni.

Atlantikup Avannaani Suleqatigiit folketingimi ilaasortaatitaat  folketingimi illuatungiliuttunut ullaatungaa ataatsimeeqatiserinnipput, nutaarsiassarlu kingulleq tassaavoq socialdemokratit siuttuisa ilaasortatik kajumissaartussanngorsimammatigik taasisimanertik uterteqqullugu. SF-illu siulittaasua Holger. K. Nielsen Atlantikup Avannaani Suleqatigiinnik suleqateqarneq ingerlatiinarusullugu oqarpoq.

 Atlantikup Avannaani Suleqatigiit folketingimi illuatungiliuttunik teknikkikkut suleqateqarunnaarpata illuatungiliuttut ataatsimiititaliani arlalinni inissaminnik annaasaqassapput, soorlu nunanut allanut tunngasunik ataatsimiittartoqatigiinni, illersornissamut ataatsimiititaliami kiisalu nunatsinnut savalimiunullu tunngasunik ataatsimiitsitaliami ilaasortaatitaqarnertik annaasussaallugu.