Atlantikup avannaa killeqanngitsumik niuerfiuli
Nunat Avannarliit Killiit Siunnersuisooqatigiiffiata Islandimi, Savalimmiuni Kalaallit Nunaannilu naalakkersuisut kajumissaarpaat Islandip Savalimmiullu killilersugaanngitsumik niueqatigiittalernissamik isumaqatigiissutaat nunatsinnut aamma atuutilernissaanik periarfissanik ujartueqqullugit. Taama Nunat Avannarliit Killiit Siunnersuisooqatigiiffiat tusagassiutinut allagaqarpoq.
Siunnersuisoqatigiiffik isumaqarpoq qeqertat akornanni killilersugaanngitsumik niueqatigiittoqalerpat nunat, pisortat inuussutissarsiutillu akornanni annertuumik iluaqutaassasoq.
Islandip Savalimmiullu killilersugaanngitsumik niueqatigiinnermik isumaqatigiissutaat, nioqqutissanik niueqatigiinnermi kiffaanngissusiliiginnarani, innuttaasunut assingajaanik pisinnaatitaaffeqalersitsivoq.
Assersuutigalugu savalimmiormiut islandimiullu peqqinnissaqarfiup, ilinniartitaanerup kulturillu iluani nunani taakkunani assigiimmik pisinnaatitaaffeqarput. Isumaqatigiissut nunat akornanni niueqatigiinnermi pisariillisaaginnarani aamma innuttaasut nuunnissaannut, najugaqarnissaannut sulinissaannullu pisariillisaavoq. Nunani Avannarlerni Killerni killilersugaanngitsumik niueqatigiinnermik isumaqatigiissutigiittoqarpat Savalimmiut nunarpullu danskit aningaasaqarnerannut pituttugaanerat annikillisissinnaagaa, Siunnersuisoqatigiiffik isumaqarpoq.
