Atlantiku qulaallugu ukiuunerani timmisartuussisarnissaq neriuutissaqanngilaq

Kiffartuussinissamut isumaqatigiissut aqqutigalugu Narsarsuup Københavnillu akornanni timmisartukkut attaveqartariaqarneranik Kommune kujalliup borgmesteriata noqqaassuteqarnera piviusorsiortuungitsoq, Attaveqatigiinnermut Naalakkersuisoq Jens B. Frederiksen isumaqarpoq.
Allattoq Jørgen Semionsen
novembarip 24-at 2009 10:55

Kujataani angallannerup aaqqissuusaanera pillugu ippassaq isumasioqatigiittoqarmat, Kommune kujallermi borgmesteri Simon Simonsen-ip noqqaassutigigigaluarpaa kiffartuussinissamut isumaqatigiissut aqqutigalugu Narsarsuaq ukiukkut aamma, Atlantiku qulaallugu timmisartuusisarnermi Narsarsuaq isumalluutaasariaqaraluartoq.

Siunnersuut Attaveqatigiinermut Naalakkersuisup Jens B Frederiksenip itigartitsissutigaa.

-Air Greenland aningaasatigut ajornartorsiorluni sulisunik soraarsitsiortorsimammat, nunattalu karsia aningaasatigut pitsaangitsumik inissisimammat ukiuutillugu Narsarsuarmiit Københavnimut timmisartukkut aqquteqaanarnissaanut nunatta karsia isumalluutigineqarsinnaangilaq, Attaveqatigiinermut Naalakkersuisoq Jens B Frederiksen oqarpoq.

Narsarsuarmiit Københavnimut utimullu aqqut Air Greenlandip ukiumut 12-15 millionit koruunit tikillugit amigartoorutigisarnerarpaa.

-Kujataani guldtisiortoqaqqittussanngormat kujataaniit nunanut allanut timmisartukkut toqqaanartumik aqquteqartariaqarnera pisariaqartinneqalissammat, inatsisartuni ilaasortat isumalluutigilerlugit Kommune Kujallermi borgmester Simon Simonsen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq