Atlantikoq qulaallugu timmisartuussineq iluatsinngitsoorpoq
Air Greenlandip timmisartuutaa Boeing 757, Kunuunnguaq, Narsarsuarmi perserpallaarnera pissutigalugu minngitsoorpoq. Kunuunnguaq Københavnimut utiinnartariaqarpoq, ilaasullu Københavnimi hotelimi unnuisariaqarput.
Timmisartorsuup Danmarkimut ullumikkut utiinnartariaqarnera pissutigalugu immikkut ittumik aqagu ullup qeqqata siorna timmisartuussisoqassaaq, tassa Kunuunnguaq Københavnip Narsarsuullu akornanni angalassammat.
Kujataani silarluppallaarnera pissutigalugu Nuup, Paamiut Narsarsuullu akornanni timmisartuussinissaraluit ullumikkut taamaatiinnarneqarput, Kujataanilu qulimiguulimmik timmisartuussinissat ilaat aamma eqqorneqarput.
Air Greenlandip Radioaviisimut ilisimatitsissutigaa Kangerlussuarmi Narsarsuarmiluunniit silarlunnera pissutigalugu timmisartorsuit Danmarkimut ukioq manna arfineq-marloriarlutik utiinnartariaqarsimasut. Ukioq 2008 tassaavoq timmisartuussinissanik taamaatitsiinnarfiunerpaaq. Kangerlussuarmi silap ajornera pissutigalugu timmisartorsuit missinnaasannginnerat siornatigut ajornartorsiutaaneq ajoraluarpoq, Kangerlussuarmimi mittarfik tassaanerarneqartarpoq nunarsuatsinni mittarfinnit tamanit isumannaannerpaaq, Kangerlussuarmi qaqutigut silarluttarmat.
Timmisartorsuaq ilaasussat tamaasa ilaasoralugit missinnaanani Danmarkimut utiinnartariaqaraangat tamanna 1 millioni koruunit missaannik naleqartartoq Air Greenlandip naatsorsuutigaa. Aningaasat taakku makkununnga atorneqartarput: Nerisassanut, ilaasut unnuisariaqalersut unnuiffissaannukaassorneri, unnuineri, orseqqittariaqarneq, timmisartumi sulisut allanik taarsertariaqarnerat taavalu aallalernermi minnermilu akiliutit aningaasartuutaasariaqartarmata.
