Atlantikoq qulaallugu sisamariarluni aqagu timmisartuussisoqassaaq
Timmisartuutileqatigiiffik aqagu tallimanngornermi Danmarkip nunattalu akornanni arlaleriarluni timmisartuussiniarpoq.
Qallunaat timmisartuutileqatigiiffianniit Jet Time-miit timmisartunik Boeing 737-nik pingasunik Air Greenland attartorniarpoq. Taakkunannga marluk Københavnimiit Kangerlussualiassapput pingajuallu Københavnimiit Narsarsualiassalluni.
Taamatuttaaq timmisartuutileqatigiiffiup Airbusia suli Kangerlussuarmiippoq, ullumi nunatsinnut timmisartuussereernermi kingorna suli Københavnimut utinnginnami. Tamanna qaqqap innermik anitsisup qullaatsitai pissutigalugit Qallunaat Nunaata silaannartaata angallaffigeqqusaajunnaaqqinneranik pissuteqarpoq. Air Greenlandilli naatsorsuutigaa, Airbus aqagu tallimanngornermi ullaap tungaani Københavnimut uterumaartoq, soorunami naalagaaffiup timmisartuussinermut qullersaqarfianit timmisartuussisinnaanerup akuerineqarnissaa tamatumani aallaaviussaaq.
Timmisartunik attartukkanik Kangerlussuarmut Kangerlussuarmiillu timmisartuussinissat marluusut nunatsinnut ingerlaarnerminni Bergenimut Norgimiittumut orsersorniarlutik akunneqqaassapput. Taamaaliornikkut timmisartunut ilaasinnaasut amerlanerpaat, tassalu tamarmik immikkut 146-nik ilaasoqassarsinnaassapput.
Atlantikoq qulaallugu timmisartuussinissarpassuit Qallunaat Nunaanni ingerlaqqeriarfissaqartinneqasssapput, taamaammallu Air Greenlandip neriuutigaa ilaasussat utaqqisut 1300-uusut amerlanerpaartaat - Qallunaat Nunaanni nunatsinnilu - tallimanngornerup ingerlanerani apuukkumaartut.
Ilaasussat tallimanngornermi nalinginnaasumik timmisartuussinissamut ilaasussat, nalinginnaasumik aallariartorsinnaapput.
Immikkut ittumik timmisartuussinissanut ilaasussanngortut Air Greenlandip sulisuinit ualinerani unnukkiartorneranilu attavigineqarumaarput.
Taamaalilluni ilaasussat 250-it sinnerutissapput, taakkulu annertunerusumik aqagu paasissutissinneqassapput.
Air Greenlandip oqarasuaataa 34 33 35 suli sianerfigineqarsinnaavoq timmisartuutileqatigiiffiulluunniit nittartagaa www.airgreenland.gl alakkarneqarsinnaalluni.
Ullup aallarfissap allanngortinnissaanut bilitsilluunniit utertinnissaannut periarfissaq, apriilip 28-anni bilitsilinnut atuuttussanngorlugu sivitsorneqarpoq.
Angallannermut tunngasut pillugit annerusumik paasisaqarumaguit, knr.gl alakkartersinnaavat.
Tallimanngornermi timmisartuussinissamut pilersaaruit:
Timm. nr. Aallarfissaq Aqqut Tikiffissaq
GL 1779 07:00 København – Bergen - Kangerlussuaq 08:45
GL 1780 09:45 Kangerlussuaq - København 17:55
GL 781 09:10 København – Bergen - Kangerlussuaq 10:55
GL 782 15:55 Kangerlussuaq – København 00:15
GL 3785 13:30 København – Narsarsuaq 14:10
GL 3786 16:10 Narsarsuaq – København 00:25
