Atlantami politiit pisortaat taartumik amilik inuartarineqarnera pissutigalugu tunuartoq

Taartumik amilik Atlantami politiinit aallaaneqarluni toqunneqarmat politiit pisortaat suliffimminit soraarpoq.

Atlantap borgmesteria Keisha Lance Bottomip politiit pisortaata Erika Shieldsip soraarniuteqarnera akuerisimallugu paasissutissiivoq. Nutaarsiassaqartitsivik Reuters taama allaaserisaqarpoq.

27-nik ukiulik Rayshard Brooks neriniartarfimmut Wendy's-imut inniminniinissaminut utaqqitilluni biilimini tallimanngornerup unnukkuani sinilerpoq.

Brooksip pisiniat allat aqqutissaannik assersormagit neriniartarfimmi sulisut politiit attaveqarfigaat. Politiit nalunaarusiaanni Georgiami paasiniaasartut GBI-meersut allataannit tamanna atuarneqarsinnaasoq nutaarsiassaqartitsivik AFP allappoq.

Tigusarinninneq eqqarnermik kinguneqarpoq

Rayshard Brooks imigassartorsimasoq tigusarineqarumanani akerliliivoq. Pisoq filmiliummi immiunneqarsimasumi takuneqarsinnaavoq "Brooksip politiip illuinnarsuutaa qupinnguallatsitsisartoq tigoriarlugu qimaasoq", GBI allappoq.

Brooks qimaammat politiit arpallutik malersulerpaat, taannalu politiinut saariarluni illuinnarsuummik politiip aappaa umerpaa politeerlu imminut illersorniarluni aallaavoq.

Rayshard Brooks napparsimmaviliaanneqarpoq suliaritinnerminilu toqulluni. Politiip aappaa pisumi ikilerneqarsimasoq nalunaarusiami atuarneqarsinnaavoq.

Politeeq soraarsinneqartoq

Pisoq Atlantami, Georgiap illoqarfiisa annersaanni, akerliussutsimik takutitsiffigineqarpoq. Silap taarsinerani neriniartarfik Wendy's akerliussutsimik takutitsisut ikuallappaat nungullugu, nutaarsiassaqartitsivik Reuters taama allappoq.

Politeeq Rayshard Brooksimut toqutsisoq soraarsinneqarsimasoq CNN allappoq. Politiit tusagassiorfinnut oqaaseqartartuat taama paasissutissiivoq.

USA-mi politiit ammip qalipaataanik immikkoortitsisarnerat nakuusertarnerallu sapaatit akunneri kingulliit arlallit akerliussutsimik takutitsiffigineqarput. Taartumik amillip George Floydip politiinit toqunneqarnerata kingorna akerliussutsimik takutitsinerit aallartipput.

Floyd Minneapolisimi maajip ulluisa 25-anni politiinit tigusarineqarnermini politiimit minutsini qulingiluani toqqusasseqqaneqarluni inuartarineqarpoq.

Politeeq toqutsisimasutut unnerluunneqarpoq, suleqataalu pingasut toqutseqataasutut unnerluunneqarlutik.

Atlantami politiit marluk Brooksimut saassussisut aqqi avammut nalunaarutigineqarsimasut nutaarsiassaqartsitsivik CNN allaaserisaqarpoq.

Garrett Rolfe Devin Bronsanilu, taakku marluullutik qaamasumik ameqarput.

CNN naapertorlugu Garrett Rolfe soraarsitaavoq Devin Bronsanilu politiini immikkoortortaqarfimmut allamut nuutsitaalluni.