Atisat akuutissanik peqqinnanngitsunik akoqartorujussuusinnaapput

Nioqqutissat Kina-meersut ajoquteqarnerat maanna kingumut paasineqarpoq. Nunatsinni aamma Kina-meersunik nioqqutissaqarpoq. Ilaatigut atisat Kina-meersut nunatsinni pisiniarfinni pisiassaapput.

New Zealandimi taamungaannaq tigooqqaalluni misissuinermi paasineqarpoq ilaatigut meeqqat atisaanni peqqinnanngitsunik akoorutissanik akulerujussuusoq.

New Zealandimi tv 3-mi atuisartunut aallakaatitassiortarfiup ilisimatuut naalakkersuisut misissuisoqarfianneersut qinnuigisimavai inersimasunut meeqqanullu atisat nalinginnaasut Kina-mit tikisinneqarsimasut misissuiffigeqqullugit. Misissuisut tupaallangaaramik isumaqarsimagaluarput kukkullutik. Tassami paasileramikku meeqqat atisaanni meqqulualinni aamma annoraassiassani akuutissaq qalipaatinut, sanaartornermut annoraaminernullu atorneqartartoq formaldehyd akuerisaasumit 900-riaammik annertunerusoq meeqqat atisaanniittoq. Akuutissaq formaldehyd atisaliortut ilaannit atorneqartarpoq, tassa atisat oqunnissaat pinngitsoorniarlugu. Kisianni akuutissaq formaldehyd attoraanni amermut ajoqusiisarpoq, anersaartorniarnermut akornusiisarluni annertuallaarpallu kræfteqalissutaasinnaalluni.

Maanna New Zealandimi naalakkersuisut atisat Kina-meersut isumannaatsuunerat misissorluarnialerpaat. Iliuuseqartoqarnissaa pisariaqartinneqarpat piaartumik iliuuseqartoqassasoq New Zealandimi atuisartut ministeeriaqarfianni pisortaq oqarpoq.

Tassa misissuineq pivoq New Zealandimi pisiniarfissuit ilaata meeqqanut sinngusit Kinameersut tuniniarunnaareeraallu. Unniami nukappiaraaqqanut sinngusit meqquluallit Kinameersut ikuallalersimagaluartut. Naak ikuallajaatsutut allagartalerneqarsimagaluartut.

New Zealandip ministeriunerata oqaatigaa nioqqutissat isumannaatsuunissamik naammassinninngitsut tuniniarnissaat inerteqqutigineqalissasoq.

New Zealandimi paasisat tassaaginnarput Kinap isumannaatsuunissamut sumiginnaasimaneranik paasisarpassuit ilaat. Soorlu qanittukkut nunarsuarmi pinnguaarniarfiit annersaata Kinameersup tunisassiani 18 millioniusut tuniniarnerat isumannaatsuunissaq pissutigalugu unitsittariaqarsimavai.

Kinami oqartussaasunit nunani allamiut niuernikkut killilersuinerat naapertuilluanngitsutut naalakkersuinikkullu sunnersimaneqartutut taaneqarpoq.

Kisianni EU-p niuernermut kommissæriata Peter Mandelsonip tamanna ilumuunnginnerarpaa oqarlunilu niuerneq pineqarani peqqissuunissaq pineqartoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat