Atisaliornermi kapisillip amia mutiuvoq

Aalisakkat amii alutorineqaleriartorput. Kapisilik tassaaginnarunnaarsimavoq nerisassaq. Aalisakkap amia aamma atisaliornermi atorluarneqarsinnaasoq atisanik ilusilersuisartut paasereersimalerpaat.
Allattoq Louise M. Kleemann
apriilip 01-at 2011 08:02

Aalisakkat amiisa piumaneqarnerulernerat islandimiut suliffeqarfiutaanni Atlantic Leatherimi atorluarneqalereerpoq.  Suliffeqarfimmi tassani aalisakkat amii, soorlu suluppaagaasat, kapisillit, saarulliit qeeqqallu amii, atisaliornermut atugassianngorlugit tunisassiarineqartarput.

Suliffeqarfiup isertitai ukiup kingullup ingerlanerani  85 procentimik amerleriarsimapput. Aamma suliffeqarfimmi sulisut ukiup ataatsip ingerlanerani aqqaneq-marlunniit 30-nut amerlineqartut, suliffeqarfiup nittarsaassinermut tunisassiornermullu pisortaa  Maria K. Magnúsdóttir, islandimiut aviisiannut Icenewsimut oqarpoq.

Atisanik ilusilersuisartut tusaamasat soorlu Dior, Louis Vuitton aamma Hugo Boss suliffeqarfiup sullitaanut pingaarnernut ilaapput.

- Atisanik ilusilersuinermi aalisakkat amiinik atuisarneq aatsaat aallartilaaginnartoq ilimagaara, Gunnsteinn Björnsson, suliffeqarfimmik pilersitseqataasoq Icenewsimut oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq