Kangaatsiami atuarfik: - Atisakka tamaasa piiaqqullugit oqarfigivaanga

Anaanaasup paniusullu Kangaatsiami meeqqat atuarfianni ilinniartitsisup killissamik qaangiineranik misigisatik oqaluttuaraat.

Allattoq Paarnannguaq Nielsen, Markus Valentin, Irene Jeppson

maajip 12-at 2026 07:36

Nutserisoq Connie Fontain

- Meeqqat amerlasuut immaqa eqqungaareernikut eqqungaaqqittut takorloornarput immaqa aamma taama misigisaqaqqipput, imaluunniit assingusumik, anaanaasoq oqarpoq.

Kangaatsiap Atuarfiani Iparartarfimmi angajoqqaat eqimattat ikioqqullutik siorna novembarip aqqarnanni allagaqaateqarput.

Taakku meeqqami ilinniartitsisunit, pingaartumik 2024-p kingorna, kinguaassiutitigut killissamik qanoq qaangiiffigineqarsimanerannik, malersorneqarnerannik, nakuuserfigineqarnerannik kiisalu timikkut tarnikkullu persuttagaasarnerannik oqaluttuarput.

Anaanaasup paniusullu misigisimasatik oqartussaniillu qanoq sumiginnarneqarneqartutut isigisatik maanna oqaluttuaraat.

KNR-ip suliap politiinut unnerluutigineqarsimaneranut uppernarsaatit takoreerpai.

Ilanngutassiaq una anaanaasup paniusullu pisimasunik namminneq oqaluttuarnerannut tunngassuteqarpoq.

Taamaammat inuit kinaassusaat isertuunneqartut

KNR-ip suliap ilungersunarnera, nunaqarfiup angissusaa eqqugaasullu atugaat eqqarsaatigalugit suliami ilaasut kinaassusaat sapinngisamik paasiuminaallisarpai.

Aaqqissuisoqarfiup angajoqqaat, meeqqat, inuit oqartussaasut kiisalu unnerluutigineqartut aqqi ilisimavai.

Angut ilinniartitsisoq

Angut ilinniartitsisoq niviarsiaqqap klasserinngisaani allami sulilerpoq.

Piffissaq ingerlalaalereersoq meeqqat ilaasa eqqunngitsoqartoq maluginialerpaat.

- Maluginialernikuungakku soorlu killissamik qaangiisartoq, niviarsiaraq oqarpoq.

Ilinniartitsisoq niviarsiaqqap klassiani ukiut marluk matuma siorna ilinniartitsisunngormat niviarsiaraq atuarnaveersaartarpoq.

Ullorli ataaseq atuariartorpoq; ulloq tamanna puigunngisaannarpaa.

- Atisakka tamaasa piiaqqullugit oqarfigivaanga oqaatsinillu killissamik qaangiisunik oqalulluni. Nukappiaqqat illartinniaannarlugit taamannak oqalulluni taava nukappiaqqat illariarmata sakkortusiartorpoq oqalunnerulerluni, niviarsiaraq oqarpoq.

Pisoq niviarsiaqqap puiorsinnaanngilaa, taassumalu pissusaa allanngoriartulerpoq.

- Siullermik tupaqqanikuuvunga qeriusallunga nalullugu qanoq iliussanerlunga, matoqqanerulerlungalu, taanna oqarpoq.

Atuaqatitit niviarsiaqqat allat aamma taama pineqartarpat?

- Suu.

KNR ukkatarinnittoq: Kangaatsiap Atuarfia Iparartarfik

KNR-ip meeqqanut killissamik qaangiisumik pissusilersuutit, kinguaassiuutitigut naapertuilluannginnerit nakuusernerillu pillugit oqaluttuat arlallit piffissami tulliuttumi saqqummiutissavai.

Oqaluttuat tamarmik Kangaatsiap Atuarfiani Iparartarfimmi angajoqqaanit meeqqaniillu oqaluttuarineqarput.

Illit imaluunniit nalunngisavit arlaat meeqqat atuarfianni assingusumik nalaataqarsimaguit redaktion@knr.gl-imut attaveqarnissannut tikilluaqqusaavutit.

Kisimiittutut misigisimaguit oqaloqateqarnissannillu pisariaqartitsiguit Tusaanngamut attaveqarsinnaajuaannarputit.

Oqarasuaatikkut siunnersuisarneq tassaavoq kinaassutsimik isertuussilluni illit siunnersuisullu akornassinni inuttut oqaloqatigiinneq, tassani oqaloqatigiinnerup imaa illit aalajangissavat.

Meeqqat, inuusuttut inersimasullu tamarmik oqaloqateqarnissamik allaqateqarnissamilluunniit pisariaqartitsisut Tusaannga attavigisinnaavaat. Tusaanngamut attaveqarneq kinaassutsimik isertuussisinnaaffiuutigaluni akeqanngilaq – aamma Tusassit imaqanngikkaluarpalluunniit sianersinnaavutit.

Oqarasuaat: 80 11 80

SMS: 1899

Anaanaasoq paniusorlu

Niviarsiaqqap arnaata panimi atuartitsinermi malinnaaniarnini ajortorsiutigileraa maluginiarpaa.

- Atuarfimmi soorlu tiimeqartilluni malinnaasinnaajunnaarpoq tusarnaaraluarluni paasinnissinnaanani. Taava mattusimalerluni sunullu tamanut soqutigisaarulluni, anaanaasoq oqarpoq.

Niviarsiaqqap ilinniartitsisumit killissamik qaangiiffigineqarnermi kingorna pisoq anaanaminut oqaluttuaraa.

- Taama pisoqareernerata kingorna ingerlaannarlunga iliuuseqarnikka aallartippakka, anaanaasoq oqarpoq.

Malersuineq

Anaanaasoq atuarfiup pisortaanut qanoq pisoqarsimaneranik oqaluttuarpoq.

Anaanaasup nipangiusimasussaatitaasoqartoq tassani paasivaa. Nipangiusimasussaatitaanerli unioqqutinneqarsimasoq sivitsunngitsoq paasitsaappaa.

Angut ilinniartitsisoq angajoqqaat arlallit oqarnerat naapertorlugu atuarfimmi ilinniartitsisuusimasumik allamik inooqateqarpoq.

Atuarfiup pisortaata akissutaa tamakkiisoq

Suliat inuit ataasiakkaanut tunngasut atuarfiup pisortaatut mianerilluinnarlugit suliaammata ataasiakkaanut tunngassuteqartut oqaaseqarfigisinnaanngilakka.

Taamaattorli erseqqissaatigissavara atuarfiup ingerlanneqarnerani suulluunniit naammagittaalliutit apuunneqartartut pimoorullugit tiguneqartarmata malitassallu inatsisimik tunngaveqartut malillugit naammagittaalliutit suugaluartut imarisai tunngavigalugit suliarineqartarlutik. Naammagittaalliutit saaffiginnissutilluunniit eqqortumik suliarineqarnissaat qulakkeerneqarnissaallu atuarfiup pisortaatut akisussaaffigaakka.

Uannut atuarfiup pisortaatut toqqaannaq naammagittaalliummik tigusaqartoqarsimappat isornartorsiuisoqarsimappat tamanna sulisitsisumma suliassaraa misissussallugu.

Nipangiussimasussaatitaaneq pingaartilluinnarneqartoq ilanngullugu oqaatigiumavara. Naqissuserusupparalu sulianut ataasiakkaanut suliarisarsimasannut tunngatillugu nipangiussisimasussaatitaaninnik unioqqutitsinikuunnginnama.

Atuarfimmi atuartut toqqissisimallutik atuarnissaat, angajoqqaanik suleqateqarnermi sulisullu ulluinnarni sinaakkutaasut malillugit ingerlatsineq pingaaruteqarluinnarmat tamannalu akisussaaqataaffigaara qulakkiissallugu.

Allisiguk

Anaanaasup atuarfiup pisortaanut saaffiginninnerata kingorna angutip inooqataa niviarsiaqqamut saaffiginnippoq.

- Taassuma aappaata panipput tunuaniit malillugu oqaatsinik nuanninngitsunik oqaluullugu tunuaniit malersorlugu oqaluullugu: - Salluliuutigiunnaarniaruk.

Niviarsiaqqap paniusullu tatiginninnerat taamaalilluni unioqqutinneqarpoq, taakkulu kina tatigisinnaanerlugu qularutiginnilerput.

Attaveqatigiinneq piumassuseqarnerlu

Anaanaasoq tamatuma kingorna oqartussanut assigiinngitsunut matumani Kalaallit Nunaanni Politiinut suliamik misissueqqissaalersunut saaffiginnippoq.

KNR-ip politiit oqaaseqartinniarlugit attavigai, taakkuli suliat ataasiakkaat oqaaseqarfigisinnaanagit paasissutissiipput.

Naak suliaq suli naammassinngikkaluartoq anaanaasoq paniusorlu susoqarsimanera pillugu oqaloqatigiissinnaanertik nukissamik nassaarfigaat.

- Taakkunatigut ilungersorluta angusaqarniarsuaarpugut. Taanna immaqa iluaqutigivarput uatsinnut attaveqatigiinnerput taavalu nammineq piumassuseqarluni, anaanaasoq oqarpoq.

Paniusullu susoqarsimaneranik nipituumik oqaluuserinninneq iluaqutigisimallugu aamma oqaatigaa.

- Eqqartorneruleriarakkit oqaatigisarlugit oqiliartoriarluni soqutaajunnaariarlutik.

- Taava eqqaaneqaqqikkaangat utersaarujulertarpunga, paniusoq oqarpoq.

Atuaqatitit allat aamma taama pineqartarsimappata arlaannik eqqartueqatigiittarpisi?

- Taamaalitallannikuuvugut eqqartueqatigiillattaartaratta kisianni ingerlaannaq immineerneqaasakkami eqqaaneqarpiassaarluni siullermik eqqartortarnikuungaluaratsigu soorlu eqqumiingiusallugu pissusaa taamaattoq kisianni eqqaaneqarpiassaarnikuuvoq.

Qanorippa eqqartorunnaariasaarlugu?

- Uagut immaqa allallu eqqartornerugatsigu, taakkuulluta eqqartueqatigiissaarnikuuvugut, niviarsiaraq oqarpoq.

KNR-ip meeqqat atuarfianni atuartunut angajoqqaanit oqaluttuat annikitsortalersugaanerusut ulluni makkunani saqqummersippai.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.