Athenimi ikuallattoqarnerani ikinnerpaamik 60-it ajunaartut

Grækenlandimi illoqarfiup pingaarnersaanni, Athenimi orpippassuarni ikuallarujussuartoqarnerani inuit ikinnerpaamik 60-it ajunaarput. Ajunaarsimasullu amerliartortuarsinnarlutik. Qatserisartoqarfiit nutaarsiassaqartitsivimmut AP-mut taama ilisimatitsipput.
Nunap panernarnerata kingunerisaanik orpippassuarni ikuallattoqarpoq. Assi © : Weekend Wayfarers/Flickr Creative Commons
Allattoq Ritzau
juulip 24-at 2018 07:40
Nutserisoq Bikki P. Kleist

Qatserisartut 300-t sinnerlugit qamisaapput, timmisartut tallimat helikopterillu arfineq marluk aamma qamisaaqataallutik.

- Ajunaarsimasut amerlanerit angerlarsimaffimminniissimapput ilaallu biiliminniissimallutik, Grækenlandimi naalakkersuisut sinnerlugit oqaaseqartartoq taama oqarpoq.

Ikuallannerup nalaani inuit ilaat angerlarsimaffimminnit anisinnaajunnaarsimapput ilaallu biiliminniiginnartariaqarsimallutik, amerlanerillu ajunnaarsimapput ikilerneqarlutilluunniit, oqaaseqartartoq taama oqarpoq.

Ilaqutaasut annaassiniartullu sakkortuumik siumugaqarsimasut immikkut ikiorserneqartussanngortut, Røde Kors ilisimatitsivoq. Inuit ikuallagussaasimasut 26-t nassaarineqarput taakkunani meeqqat ilaallutik.

- Inuppassuit tupaqqapput, ilaquttaminnik annaasaqarsimapput illutillu annaallugit, tapersersorneqarnissaminnullu pisariaqartitsillutik, Røde Korsimit oqaaseqartartoq oqarpoq. 

Illorpassuit ikuallapput inuillu amerlaqisut napparsimmavimmut unitsinneqarsimallutik.

Grækerit premierministeriata, ulloq aliasuffittut oqaatigaa.
 

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk