Atertarmiut ajugaapput

Inissiaatileqatigiiffiup INI-p Nuummi immikkoortortaqarfiani Atertami inissianik attartortut ineqarnerminnut ukiuni arfineq-marlunni akiliivallaartarsimapput, Østre Landsret ulloqeqqata siorna taama aalajangiivoq, tamannalu INIp attartortuinut allanut sunniuteqarsinnaavoq. Eqqartuussutikkut oqaatigineqarpoq INI ajunngitsorsiassarsiortarsimasoq inissiaatileqatigiiffittut taama iliortussaanani.

- Østre Landsretip aalajangiinera ullumi tiguarput, aalajangiinerli siulersuisunit oqaaseqarfiginngikkallassavarput, inatsisitigut tunngavineqartut misissorluaqqaartinnagit. Inissiaatileqatigiiffiup inatsisitigut suinnersortini aamma oqaloqatigeqqaassavaa, Østre Landsretip aalajangiinerata kingunissai iliuusissallu oqaloqatigiissutigissallutigik. INI-p siulersuisuisa siulittaasuat Inge Bisgaard nassuiaavoq.

Aamma oqarpoq, siulersuisuni siulittaasutut inissisimalluni taama aalajangertoqarnera ajuusaarnartoq. Matumanili inatsisitigut tunngavigisat pineqarmata suliaq ingerlateqqinneqassanerarpaa.

- Neriuppunga Østre Landsretip aalajangernera ineqartunut allanut tunngatillugu annerusumik sunniuteqassanngitsoq, allaffissornermullu tunngasut allannguuteqartinneqassanersut maannakkorpiaq oqaaseqarfigisinnaanngikkallarparput. siulittaasoq erseqqissaavoq.

Inge Bisgaardip suli naluaa inissianik attartortut oorinik qassinik utertitsivigineqassanersut – malugalugu Østre Landsretimi eqqartuussut allanngortinneqanngippat.

Kalaallit Nunaata eqqartuussiviata siusinnerusukkut oqaatigereerpaa Atertarmiut 3,8 mio. kronenik akiliivallaarsimasut, taamaattumik Danmarkimi eqqartuussut ataannassappat aningaasarparujussuit inuttavimminnut utertinneqarussaassapput.