Atersuarni ikuallattoqarnerani eqqugaasut katersuiniutilerpaat
Tallimanngormat unnukkut Atersuarni ikuallattoqarmat angut 46-nik ukiulik ajunaarpoq, inuillu allat 12-ut inigisaminniit qimagussortinneqarput. Atersuarni najugaqarsimasut massakkut vandrehjemmimi najugaqarput, atisatik pequttatillu ikuallattoqarnerani annaasimallugit. Massakkulli illit ikiorsinnaanngorpatit.
- Atersuarni ineqartut ikuallattoqarnerani annaasaqarnikut ikiorniarlutigit innuttaasunik ikiuerusuttunik pissarsiorpugut. Atisanik imaluunniit pequtinik tuniserusukkuit kulturip illorsuanut Sermermiunut tunissuteqariartorsinnaavutit, taama Qaasuitsup Kommuniani Pitsaaliuinermi Immikkoortortaqarfimmi pisortaq Helga Nielsen, Ilulissani najugaqartunut allagartani nivinngaassukkani ilisimatitsivoq.
Katersuiniarneq kulturip illorsuani Sermermiuni pissaaq ullumi arfininngornermi nal.13.00-imiit nal.15.00 tungaanut.
Ikuallannermut suna pissutaanersoq politiit suli paasiniarpaat. Immikkut ilisimasalik misissuinerminit nalunaarsioreerpoq maannalu najugaqartut politiit oqaloqatigeqqinniarpaat itisiliinerusumik paasiniaaviginiarlugit.
