Aterput taarserusukkutsigu taarsersinnaasariaqarparput
Atigut angajoqqaatsinnik tunissutisiaraagut. Kuisippugut atertaarlutalu taakku kissaataat naapertorlugu. Kisianni qanorluunniit angajoqqaagut asatigigaluarutsigit imaanngilaq uangutsinnik atertaartitsisimanerat nuannariuaannassagipput.
-Kialluunniit atini aliasuutigisariaqanngilaa aamma taamaattumik periarfissaqartariaqarpoq ateriumasamik atserneqarnissaq, ateq toqqarneqartoq paquminanngippat imaluunniit ateq arlaatigut illersungaanngippat.
Ullumikkut takusareerpagut innuttaasut ilaasa kinguliatik taarsertaraat, katikkaangamik. Aamma takusarpagut inuit ilaat allamik taaguutitaartartut – numerologimik isumasioqateqarsimariarlutik innersuunneqarsimariarlutilluunniit. Tamanna akorngutissaqanngilaq pissusissamisoorlunilu, Justus Hansen oqarpoq.
Demokraatini isumaqarpugut, annermik innuttaasut namminneq aalajangersinnaasariaqaraat qanoq ateqassanerlutik. Taamaattumik kissaatigaarput atsiisarneq pillugu inatsit sapinngisamik eqaannerpaajusariaqaraluartoq.
-Ajoraluartumilli nunatsinni imaappoq, ateriumasamik atertaartoqarsinnaanani suli. Innuttaasut katikkaangamik aappartaamik atianik taaguutaanngitsumik atertaarumagaluarlutik itigartinneqartarnerat assersuutissaqarpoq, atsiisarneq pillugu inatsit nassuiarneqartarmat, ati taaguutaanngitsoq annerusumik attuumassuteqarfigineqanngitsoq, Justus Hansen oqarpoq.