Aterminik taasinngikkaluarluni oqaatiginnissinnaasariaqarpoq

Ullumi ulloq tassaavoq naalagaaffiit Peqatigiit arnanik persuttaasarneq akiorniarlugu ullorititaat. Nunatsinni 2006-imi qimarnuinnut saaffiginnissimasut 1083-iupput ukiunilu arlalinni amerlassusaat allanngungaarsimanngilaq:

- Tassa ikiliallalaarlutillu kisitsisit taamaattuaannangajapput. Peqqutaasutut immaqa taasinnaavara atuisut ilai aamma uteqattaartuusarmata, Regine Enoksen nassuiaavoq.

Aamma pissutaanerarpaa nunatsinni annersaanermut tunngatillugu oqaluuserinninngippallaarneq. Iliuuseqarnissamullu tunuarsimaarpallaarneq.

- Qujanartumik ukiuni kingullerni novembarip 25-ani pisoqartalernera nuatsinnut qujanartorujussuuvoq.

Annersaasarnerlu oqallisaanerusariaqarsoraa inuttullu atukkat pillugit aamma oqaasertalersuinissat pingaartorujussuartut isigalugit, pingaartumik ilaqutariit iluanni.

- Uteqattaartuunerusarput suli piareersimanngitsut. Inuk nammineq pisussaagami qanoq iliuuseqarnissaminut qanoq alloriaqqinniaruni nammineq piumassuseqartariaqarami. Uagut qanorluunniit uteqattaartigisuugaluarpat pinngitsaalillugu peqqusinnaanngilarput: Imatut, imatut imatullu iliorniarit!

Taamaattumik saaffiginnittoq aqqutissiuutiinnarsinnaasarpaat tusaasinnaagaangamikku siunnersorneqarnissami pisariaqartikkaa.

- Ukiuni kingullerni iluatsittoqartarnera erseqqissiartorpoq malunnarlunilu arnat imminnut piumaffigiartuinnarnerat.

Sineriassuarmili suli tunuarsimaarpallaartoqarsoraa.

- Isumaqarpunga tusarnaaginnartoqarsinnaanngitsoq, tusaasaqarsimagaanni kalerriunnissaat pingaartuuvoq. Regine Enoksen oqarpoq.

Tunuarsimaarfigineqartartoq tassaavoq annilaangaginnittarneq kalerriussigunik soorlu paasineqarnissartik nammineq kalerriussisuullutik.

- Annilaangassuteqartarneq pinngitsoortinneqarsinnaavoq kalerriussinermi piumasarisinnaagaanni, nammineq aterisaq taaneqassanngitsoq.

Ullormut matumunnga atatillugu kattuffiup oqariartuutigaa: Ajunngitsumik alloriarneq.

- Tassani erseqqissaatigaarput sorsuutigerusullugulu meeqqat persutagaaffiusuni eqqugaaginnartutut isigineqarnerat allanngortikkiartorusullugu.

Regine Enoksen aamma oqarpoq sinerissami qimarnguinni arfiniliusuni sulisunik pikkorissartitsiuarnerit atorlugit sulinertik nukittortortikkiartuaarneqartoq.

Arnat persuttagaasarnerat akiorniarlugu suliniarneq tapersersorlugu igalaani unnugu naneruusersornissaq kattuffiup aamma kaammattuutigaa.