Atermik allanngortitsineq Tusass-imut 3,8 millionit koruuninik akeqarpoq
Tele-Postip Tusass-imik ateqalernera katillugit 3,8 millionit koruuninik akeqarpoq.
Emanuel Nukop, Naleqqameersup, § 37 naapertorlugu naalakkersuisunut apeqqutaani akissummi tamanna takuneqarsinnaavoq.
- Aningasartuutit taaguutip allanngortinneranut toqqaannartumik tunngassuteqartut immikkut isiginiassagaanni aningaasartuutit 3,8 millionit koruuniupput, Tusass akissummi ilaatigut allappoq.
Illuutit qalipannneqarnerat, sullisit ilisarnaataata allanngortinneqarnerat assigisaallu taassuma saniatigut aamma aningaasartuuteqarfiupput.
Taaguutip allanngortinneranut ataqatigiissaarneqarsimapput, taaguutillu allanngortinnissaa ukiuni marlunni pilersaarutaasimammat pissusissamisuunngitsumik aningaasartuuteqartoqarsimanani. Tusass naalakkersuisunut taama akissuteqarpoq.
AAMMA ATUARUK Tele-Post Tusass-imik taaguuteqalissaaq
Avataaniit immikkut ilisimasalinnik pissarsinissaq Tusass-ip nalilersimavaa, aningaasartuutillu 3,8 millionit koruunit akornanni 3,6 millionit koruunit tassunga atorneqarsimasut suliffeqarfiup oqaatigaa:
- Aningaasartuutit pingaartumik Savalimmiuni suuliffeqarfimmut Sendistovanimut avammut paasisitsiniaarnermik suliaqartartumut atornerqarsimapput, suliffeqarfiup taassuma assingusunik suliaqarluartarsimanera tunngavigalugu tulluarnerpaatut aqutsisunit nalilerneqarsimavoq, Tusass allappoq.
Aningaasat atuisut akikillisaavigineqarnissaannut atorneqarsimasinnaagaluarnersut Emanuel Nukop aamma apeqqutigaa.
Naalakkersuisut Tusass-ilu tassunga atatillugu ersarissumik akissuteqanngillat, Tusass-ili ima nassuiaateqarpoq:
- Ukiuni kingullerni suliffeqarfiup pisariillisaanerit piviusunngortissimavai, taakkulu tunngavigalugit ukiuni aggersuni nuna tamakkerlugu nalunaarasuartaatikkut atassutit pitsaanerulernissaannu aningaasaliinissaq attanneqarsinnaasoq peqatigisaanillu mobilinut internetimullu akit apparneqarsinnaapput, tamakkulu saniatigut Nunatta Karsianut iluanaarutissat isumaqatigiissuteqarnikkut tunniunneqarsinnaallutik.
AAMMA ATUARUK Tusass: Ittoqqortoormiit internetsimik killeqanngitsumik atuisinnaanngortoq
- Taamaammat maanna nutaamik ersarinnerusumillu kalaalerpalaartumik ilisarnaaseqarluta nunap digitalinngorsarnissaanut suliaq nangissallugu qilanaaraarput, Tusass nassuiaavoq.
