Ateq najugarlu nalunaarsorneqartalissappat
Tamanna Danmarkimi eqqarsaatersuutigineqarpoq, tassami naalakkersuisut nalunaarsuisalernissaq oqaluuseraat, oqarasuaatit angallattakkat immerneqartartut, piginnittoq paasineqanngikkaluartoq peqqarniisaarniarnermut allatullu inupiluuserniarnermut atorneqarsinnaammata.
Siunnersuut taamaatiinnarneqaraluarpoq, Inatsisinik atortitsinermut ministereqarfiup ataani suleqatigiissitap, kia oqaloqateqarnissamut mobilip imassaanik pisinerata, sumi qangalu pisinerata nalunaarsorneqartalernissaat pisariullunilu akisuallaarnissa paasereeralu.
Maannali naalakkersuisut isumartik allanngortillugu atuisut nalunaarsorneqartalernissaasa periarfissarsiuunneqarnissaa misissoqqikkusukkaat Inatsisinik atortitsinermut ministeeriaqarfiup allagaani erserpoq.
Tamatumunnga tunngaviuvoq, oqarasuaatit piginnittut tamakkerlugit paasineqarsinnaanngippata peqqarniisaarniat inupiluuserniartartullu allat periarfissarissaarnissaat annilaanngatigineqarmat. Tamannalu politiit paasiniaaqqissaartartuinit naalagaaffiullu politiivinit taamatut ernummateqarnerup ukiuni kingullerni annerulersimanera oqaatigineqarpoq.
- Peqqarniisaarniarnermut tunngasunik aaqqissuussamillu pinerluuteqarniartartut misissuiffigineqarnerini mobilip imassannik nalunaarsorneqanngitsunik atuinerup ajornartorsiutaanera ukiuni kingullerni anneruleriartorsimavoq, politiit inatsisinik atortitsinermut ministeeriaqarfimmut nalunaarutaani erserpoq.
Suleqatigiissitap "sulipallattussap" PET-mit naalagaaffiullu politiivinit inuttaqartup suliassaq upernaap tungaanut misissorniarpaat.
