Ateq "Inussuk" allamit atorneqareerpoq
Namminersulernissaq pillugu suliniaqatigiiffittaaq Inussuk aallartiinnarluni ajornartorsiulersinnaavoq.
Pingaartumik atini tunngavigalugu nittartagartaassaguni, tassami ateq Inussuk gl alanit atorneqareerpoq. Nunatsinni Takornariaqarnermi Inuussutissarsiornermilu Siunnersuisoqatigiit taanna ateq qangali atugarilerpaat, nittartagarmi inussuk gl iserfigigaanni paasissutissarpassuit takornariaqarnermut inuussutissarsiutinullu tunngasut kalaallisut qallunaatullu atuarneqarsinnaapput. Taamaatumik ateq Inussuk pisortap Stig Rømer Wintherip annaarusunngeqaa.
-Paasisinnaanngilara peqatigiiffimmik aallartitsiniartut atissarsiornerminni suut aterineqareernerat misissorsimanngimmassuk. Nunatsinni Takornariaqarnermi Inuussutissarsiornermilu Siunnersuisoqatigiit ateq atugaat allanngortinneqarnavianngilaq, Stig Rømer Winther oqarpoq.
Namminersulernissarli pillugu suliniaqatigiiffittaap siulittaasuata Mininnguaq Kleistip Inussuk suliniaqatigiiffinnit arlariinnit atorneqaraluarpat ajoriffissaqartinngilaa.
- Inussuk ilisarnaataavoq suliniarnitsinnut attuumassuteqarluinnartoq. Imaassinnaavoq nittartagartaanngitsugut, asulimi allaffissornerujussuarmik pilersitsiinnassammat, Mininnguaq Kleist oqarpoq.
-Peqatigiiffittaaq Namminersulernissaq pillugu suliniaqatigiiffik Inussuk-mik ateqassaaq Inussuk kisimiitillugu taaguutigineqarnavianngilaq, erseqqissaavoq.
