Atassutip siuttui ikiliartuinnarput
Jensine Berthelsen Radioavisimut oqarpoq, sivisuumik eqqarsareerluni tunuarluni, partiimi siuttut demokratimik paasinninnerat naammaginartinnginnamiuk.
- Taamatut naliliisariaqalersimavunga assersuutigiinnarlugu pissutigalugu, Inatsisartunut qinersinermi Atassutip ajorsarujussuarnerata kingorna, immikkoortortaqarfiit tassaasussaagaluarput ataatsimeersuarnermik piumasaqartussat. Kisianni immikkoortortaqarfiit piumasaqaratik, siulersuisuni ilaasortat eqqunngitsumik tunngaveqarlutik aalassatsitsiniaalunnertik iluatsippaat, Jensine Berthelsen oqarpoq.
Atassut qinersinermi kingullermi kinguariaqaaq. 2005-imi qinersinermi qinersisaasa affangajai allanik qinersipput, upernaarlu 3000-init taamaallaat qinerneqarpoq, Nunatsinni partiinngortut siulliup tulliata, Inatsisartuni ilaasortai pingasuinnanngorlutik.
Kisianni ajorsarneq tunuarnerminut pissutaanngitsoq Jensine Berthelsen oqarpoq.
- Iluarsiiniarneq tamaviaarnartumik assullu ilungersunartumik piffissami sivisuumi ingerlanikuugaluarpoq. Pingaartumik immikkoortortaqarfinnut isummersueqqusilluta noqqaassuteqartarpugut. Kisianni tamakkua kinguneqanngillat, taamaattumillu misigisimalersimavunga, nukikka asuli atorlugit.
- Siulersuisut suleqatigiissinnaanngitsut ataqatigiissinnaanngitsullu ataniaannarput, kisianni aggustimi immikkut ittumik ataatsimeersuartoqassaaq, siulittaasoq kisiat qineriartorlugu.
Atassutip siunissaa qanoq ippa?
- Taama suleqatigiissinnaanngitsigisunik siulersuisoqartillugu immikkoortortaqarfiillu ataqqineqangilluinnartillugit, taava partiimi mumisitsisoqanngippat, partii suli sanngiilligaluttuinnassasoq uanga takorloorsinnaavara, Jensine Berthelsen oqarpoq.
Atassutip politikkikkut siulittaasup tulliata, KANUKOKA-p siulittaasorisimasaata Søren Alaufesenip, Jensine Berthelsenip tunuarnera ajuusaarutigaa, namminerlu aalajangernera ataqqillugu. Immikkoortortaqarfiit sunniuteqartinneqannginnerarlugit isornartorsiut ima oqaaseqarfigaa:
- Politikkikkut isummersornermi Atassutip nipaappallaartarnera siunissami aaqqinneqartariaqarpoq. Taamatullu aamma immikkoortortaqarfiit isummersueqataanerusariaqarput.
Atassut siunissaqarpa?
- Uanga upperaara, Atassut siunissaqartoq, inuiaqatigiinni ukiorpassuarni sunniuteqarsimammat, Søren Alaufesen oqarpoq.