Atassutip siunnersuutai tamarmik inortuisut
- Soorunami tamanna ajuusaarutigaarput.
Atassutip siulittaasua, Gerhardt Petersen ullumi taama oqarpoq. Taassumalu nassuiaatigaa sooq oqaluuserisassatut siunnersuutit itigartitaasimanersut.
- Aap, tassa siunnersuutigut itigartitaapput, tamatumunngalu tunngavilersuutigineqarpoq siunnersuutit nassiunneqarfissaannut piffissaq killigititaasoq minuttinik pingasunik qaangersimagatsigu.
Atassutip oqaluuserisassatut siunnersuutaat tamarluinnarmik aatsaat itigartitsissutaanngillat.
Inatsisartut siorna 2011-mi upernaakkut ataatsimiinnissaanni, Atassutip oqaluuserisassatut siunnersuutaat aamma arfiniliusut tamarluinnarmik, Inatsisartut Siulittaasoqarfiannit oqaluuserineqartussaanngitsutut aamma inassutigineqarput, tamatunnga tunngavilersuutigineqarluni siunnersuutit aningaasartassaat Atassummit naatsorsorneqarsimanngimmata.
- Kingullermik taamaattoqarmat siunnersuutitsinnut tunngavilersuutitta aningaasartaat itisilerneqarsimanngimmata itigartitsissutaallutik. Tamannalu tunngavigalugu siunnersuutinik itisilerluakkanik nassiussiniartalersimavugut, Atassutip siulittaasua oqarpoq.
Gerhardt Petersenip siorna oqaatigaa kukkuluttuutit ilinniarfigisimallugit, neriuutigalugu taamatut pisoqaqqissanngitsoq, kisiannili paasinarsivoq suli pitsaanerulersimanngitsut.
- Pitsaanerulertariaqarpugut, taama naatsigisumik Atassutip siulittaasua, Gerhardt Petersen oqarpoq nangillunilu oqaatigalugu, Atassummit Inatsisartunut ilaasortat marluusut allaffissornikkut sullinneqarneri pitsanngorsartariaqartoq oqarluni allammiup atugassarititai pitsanngorsartariaqartut.
Inatsisartut upernaamut ataatsimiinnissaannut oqaluuserisassatut ilaasortanit siunnersuutit nassiunneqartut 48-uupput, taakkunannga aqqanillit oqaluuserineqassanngitsutut Siulittaasoqarfimmit innersuussutigineqarlutik.
Siorna ukiakkut ataatsimiinnermit aappassaaneerlugit oqaluuserineqarsimanngitsut aammalu aalajangiiffigisassatut siunnersuutit angumerineqarsimanngitsut katillugit aqqaneq marluusut upernaamut oqaaluuserineqassapput.
Taakku saniatigut Naalakkersuisunit oqaluuserineqartussatut siunnersuutit 26-upput. Taama nalunaarpoq Inatsisartut Siulittaasuat, Josef Motzfeldt.
Inatsisartut siorna 2011-mi upernaakkut ataatsimiinnissaannut Atassutip siunnersuutaasa tamarluinnarmik oqaluuserineqannginnissaat ilaatigut tunngavigalugit, taamani Atassutip politikkikkut siulittaasuata tullia, Steen Lynge siulersuisuunernit tunuarpoq, oqarluni partiip siulittaasuata, Gerhardt Petersenip ingerlatseriaasia isumaqatginagu tunuarniuteqarluni.
