Atassutip siulittaasua kukkussummik nassuiaavoq
Atassutip siunnersuutai arfiniliusut, Siverth K. Heilmannimit Knud Kristiansennimillu siunnersuutigineqartut, tunngavilersorluagaannginnerat, aningaasatigullu kingunerisinnaasaannik misissorluagaannginnerat peqqutaalluni Inatsisartut siulitttaasoqarfianit oqaluuserisassatut peerneqarput.
Taamaasilluni, inatsisartut upernaammi ataatsimiilerneranni Atassutip inatsisartunut ilaasortaatitai isiginnaartuinnartut inissisimassapput.
Tamanna pillugu Atassutip siulittaasua Gerhardt Petersen ima oqarpoq.
- Uanga Atassut isiginnaartuinnartutut nalilerusunngilara, soorunami Inatsisartutut allatulli isummersueqataassuugut, Gerhardt Petersen oqarpoq.
Atassutip siulittaasua Gerhardt Petersen, siunnersuutit arfiniliusut akuerineqannginnerannut pisooqataanerarpoq.
- Soorunami siulittaasutut pisooqataavunga, taamannak siunnersuutissat takkunneranni siusinnerusukkut piniarneqarsimannginnerannik, Gerhardt Petersen oqarpoq.
Atassutip inatsisartut upernaami ataatsimiinnissaanut siunnersuutigisimagaluarpaa CO2-mik annikillisaanissaq, ulloq unnuarlu meeqqat angerlarsimaffiini qanoq perorsaariaaseqarnissaq, Nammineerluni illuliorniartunut taarsigassarsinissamut pitsaanerusumik periarfissarsiornissaq, aamma mitit upernaakkut piniagaanerisa Kangaatsiamit Siorapalummut maajip qeqqanut sivitsorneqarnissaa. Taakku saniatigut aamma siunnersuutit allat marluk ilanngunneqarsimapput.
Siunnersuutigineqarsimagaluit puiguinnarneqassappat?
- Tunngavilersorluariarlugit ukiamut saqqummiunneqarnissaat naatsorsuutigaarput, Gerhardt Petersen oqarpoq.
Atassutip inatsisartuni upernaakkut ataatsimiinnermi oqaluuserisassatut siunnersuutai tamarmik akuerineqannginnerat partiimut kinguariaataassava?
- Neriuppunga kinguariaataanngitsoq, tassami nuannaarutiginngeqaarput siunnersuutigisavut iluatsinngimmata, Atassutip siulittaasua Gerhardt Petersen oqarpoq.
