Atassutip SIK-llu orsussanik akitsuineq paasisaqarfigerusuppaat

- KNI Polaroil A/S Mittarfeqarfinnut orsussamik pilersuisuupput. Mittarfeqarfinni ileqqoraarput, nunarsuatsinni orsussap akiata allanngortarnera ilutigalugu akinik qaffaanngikkutta akikinnerulersitsisarluta, Mittarfeqarfiit tusagassiisartua, Hans Henrik Lichtenberg allappoq.

Orsussat akitsornerisa kinguneranik Air Greenland qanoq iliorumaarnersoq suli nalunarpoq, taakkumi akitsuiniarnerminnik suli tusarliussaqanngillat.

Orsussat akitsornerisa kinguneranik, partii Atassut paragraf 37 naapertorlugu apeqquteqaateqarlutik ippassaq qisuariarpoq.

Orsussat akitsornerinut Naalakkersuisut qanoq isumaqarnersut, orsussallu akitsorneri pinngitsoortissimasinnaannginneraat paaserusullugu, tassami Naalakkersuisut Polaroil-imik piginnittuummata, Atassutip ujartorpaa. Aamma apeqqutigaat, qaffaannginnermi akit atuutilerseqqinneqarnissaannik Polaroil Naalakkersuisunit piumaffigineqassanersoq.

Atassutip annilaanngatigaa, akitsuinikkut Nunatsinni akissaatikitsut eqqorneqarnerpaanissaat, tassami inissiat amerlanerpaartaat orsussaq atorlugu kiassarneqartarmata.

Sulisartut Kattuffiata, SIK-p, siulittaasuata, Jess G. Berthelsenip, paaserusuppaa, orsussat akitsornerinut suut pissutaasimanersut. Nunarsuarmi orsussap akia aamma akiata nikerarnera qiviaraanni ulluni makkunani qaffakkiartunngimmat, paasisinnaanagu sooq qaffaasoqarnersoq, Jess G. Berthelsen tusagassiutinut nalunaarummini allappoq.

SIK-p siulittaasuata aamma paaserusuppaa, qaffaanermut taama annertutigisumut, Naalakkersuisut akuersisimanersut.

- Naalakkersuisut qaffaanissamut akuersisimagunik, aamma aningaasarsiat pisissutigineqarsinnaanerannik paarinniarunik allatigut akikilliliisariaqarput, tassami sulisartut aningaasarsiaannut isumaqatigiissutigineqartut aatsaat taamaaliornikkut attorneqassanngimmata isumaqatigiinniarnermilu angusat unioqqutinneqaratik.

SIK-p siulittaasua Jess G. Berthelsen allappoq.