Atassutip qinigassanngortitaa: Tele namminersortunngorsarneqarli
Telep namminersortullu unammilleqatigiinnikkut inissisimanerat pillugu piffissami kingullermi oqallinneq Ove Thomassenip qisuariaateqarfigaa. Taanna isumaqarpoq unammilleqatigiinnikkut inissisimaneq naleqqutinngitsoq Telellu tamakkiisumik namminersortunngortinneqarnissaa siunnersuutigalugu.
- Napparutit aallakaatitsissutit aallakaatitanillu siammarterinermut atortorissaarutit assigiinngitsut Namminersorlutik Oqartussanit pigineqaannarneqarnissaat takorloorpara. Taava tele suliffeqarfiillu allat assigiinnik atugassaqartitaallutik napparutinik aallakaatitsissutinik atortorissaarutinillu assingusunik atuinissamut licensimik akililluutik atuisinnaassapput, Ove Thomassen KNR.gl-imut oqarpoq.
Taanna isumaqarpoq namminersortunngorsaaneq atuisunut ilaqutissartaqartoq. Suliffeqarfiup namminersortup Inu-it-ip internetimik akikitsumik neqerooruteqarniarluni napparutinik nassitsissutinik ikkussuisimanera innersuussutigaa. Telelli Nuummi Qaqortumilu flatratemik neqerooruteqarnissaminut periarfissinneqarpoq Inu-it-lu maanna unammilleqatigiinnikkut ajorluinnartumik inissisimaqqilerpoq.
- Atuisut pitsaasunik atugassaqartinnissaannik suliffeqarfiit namminersortut neqerooruteqarsinnaanerat Telemit akornuserneqarpoq. Namminersortut suliffissanik amerlanerusunik pilersitseqataasinnaagaluarput, unammilleqatigiinnikkullu nikingasumik inississimasoqarneratigut periarfissaat killilipilorujussuupput, Ove Thomassen oqarpoq.
Atassut Inatsisartunut marsip 12-iani qinersinissamut qinigassanngortitai maanna 25-iulerput. Qinigassanngortittut allat 24-iusut Atassutip sapaatit akunnerata siuliani nalunaarutigai Ove Thomassenillu qinigassanngortinnini ippassaq ualikkut nalunaarutigalugu.
-Tele timersortartullu atugaat pillugit sammisat qineqqusaarnermi maqaasivakka. Aamma arlalinnik kajumissaarneqariarama qinigassanngortinniarlugu nalunaarpunga, Ove Thomassen, volleyballertartut kattuffianni siulittaasuunini Nuummilu politiitut sulinermini suliassaqarluareernini pissutigalugu qinigassanngortissanerluni nalornisimagaluartoq oqarpoq.
