Atassutip qineqqusaarutissamini ilinniartitaaneq pingaarnerutippaa

Atassutip qineqqusaarutaani qulequttat 19-iupput. Taakkunanngali pingasut pingaarnerpaatut isigineqarput, tassalu ilinniartitaaneq, allamiut oqaasiinik ilinniarneq kiisalu meeqqat.

- Qulequttat 19-iupput, soorunami pingaartorpassuugaluarput, isumaqarpunga ilinniartitaaneq pingaarnerpaatut taasariaqarlugu. Tassami ilinniarsimasunik amigaateqaqaagut, taannalu qulequtaq sallerpaatinneqartariaqarpoq, Finn Karlsen oqarpoq.

Taanna apereqqipparput sooq qulequtaq taanna taamak pingaartitsigineraat.

- Nunatsinni ilinniarsimasunik amigaateqartupilussuuvugut, tamanna peqqutaalluni ilinniarsimanngitsunik tigusisaqattaarluta sulisoqartarpugut. Taamalu aamma avataaniit tikerartitsineq assut atugaavoq, taamaattumik ilinniartitaaneq minnerunngitsumik qaffasinnerusumik ilinniartitaaneq pimoorullugu sulissutigisariaqarparput, Finn Karlsen oqarpoq.

Taamatuttaaq inuit nunatsinni najugaqartut allamiut oqaasiinik pikkorinnerulernissaannik kaammattorneqarnerunissaat ATASSUT-ip qineqqusaarutaani qulequttani pingaarnernut ilaatinneqarpoq.

- Nunaqqatigut allamiut oqaasiinik pikkorippallaanngippata taava ilinnialernissaannik periarfissinneqartariaqarput. Sumiginnarneqarsinnaanngillat atorfissaqarteqaagut, Kalaallit Nunaani nunallit tamarmik misigisimasariaqarput atorfissaqartinneqarlutik, oqarpoq.

Erseqqissaavoq inuit ilaat atuakkatigut oqaatitigullu pikkorinngikkaluarlutik aamma assassornikkut pikkoriffeqartartut, taakkulu atorluarneqarsinnaasut.

Meeqqat paarinerlutat pillugit qulequtaq ATASSUT-ip qineqqusaarutaani aamma pingaarnerpaat ilaannut inissinneqarsimavoq.

- Ulluni makkunani immikkut suliassaqartutut misigisimavugut, tassami meerarpassuit paarinerlutat nalinginnaaqisumik eqqartorneqartarput. Taakku pillugit immikkuullarissumik politikkikkut sullinneqartariaqarnerat atassummiit pingaarteqaarput, Finn Karlsen oqarpoq.