Atassutip Lynge aamma Nilsson qinigassanngortippai

Juunip 18-iani Folketingimut qinersinissamut Atassutip sassartitassani tusagassiortunik katersortitsilluni saqqummiuteqqammerpai.
Assi © : KNR/Nauja Møller
maajip 28-at 2015 10:23

Atassutip qinigassanngortitai tassaapput naalakkersuisuusimasoq maannalu Inatsisartunut ilaasortaasoq Steen Lynge aamma piffissami sivisunngitsumi sinniisussatut Inatsisartunut ilaasortaasimasoq Jonas Nilsson.

Naalakkersuinikkut sulinermi misilittagartooq Inatsisartunilu ilaasortaq Steen Lynge Folketingimut 2011-mi qinersisoqarmat qineqqusaarpoq, iluatsitsiunngitsumilli. Qinigassanngorteqatigaa 43-nik ukiulik Jonas Nilsson,  aatsaat siullerpaamik qineqqusaartoq.

Politikkimilu misilittakkani annikikkaluartut Atassutip anguniagai Folketingimi sulissutigissallugit piumassuseqarpoq. Partiinilu assigalugu isumaqarpoq, Atassut angusaqarnerpaassasoq Lars Løkke Rasmussen partiialu Venstre tapersersoruniuk.

 

Akissarsiat assigiit

Kalaallit qallunaallu pinerluttulerinermut isumaginnittoqarfimmi politiini eqqartuussiveqarfimmilu suligaanni assigiimmik akissarsiaqarnissaq Jonas Nilssonip suliniutiginiagaani pingaarnertut inissisimavoq.

- Danmarkimi Kalaallit Nunaannilu suliffeqaruit assigiinngissuteqassanngilaq, soorlu politiitut suliguit. Aamma utoqqalinersianut atugassarititat assigiinngitsuussanngillat. Tassa taakkuupput qaqitassat, Jonas Nilsson oqarpoq.

Allali suliassaq aamma pingaartippaa.

- Atassummi anguniassavarput, nunatsinnit Folketingimut ilaasortaagaanni ataatsimiititaliani sisamani toqqaannartumik ilaasortaasarnissaq.

Jonas Nilsson taama oqarpoq, erseqqissarlugulu ilaasortaaffissat tassaassasut, nunanut allanut politikkikkut siunnersuisooqatigit, illersornissamut ataatsimiititaliaq, inatsisinik atortitsinermut ataatsimiitsitaliaq aammalu Kalaallit Nunaannut tunngasunut ataatsimiititaliaq.