Atassutip Esport timersuutitut akueritikkusukkaa GIF-ili isumaqataanngitsoq

Qarasaasiatigut pinnguaatit ukiuni kingullerni soqutigineqaraluttuinnarput.

Pingaartumik coronap nunarsuaq tamakkerlugu tunillaassuunnerani amerlasuut nunarsuaq tamakkerlugu angerlarsimaannartitaarranneranni qarasaasiaq aliikkutarineqarluarpoq.

Tamatuma saniatigut qarasaasiatigut pinnguaatinik ajugaaniunneq ukiuni kingullerni qulini annertunerungaatsialerluni.

CS:GO-mi, Fortnitemi Warzonemiluunniit iliuuseqarnermi aallaanninnermilu kina pikkorinnerpaava?

Kina arsaattut periusissaannik aaqqissuussinermi arsartunillu isertitseriartitsinermut FIFA-mi pikkorinnerpaava?

Ajugaaniunnerit tamakku qarasaasiatigut pinnguaateqarlutik kiaguutigineqartartut Esportimik tassa qarasaasiatigut timersuutimik taaneqartarput.

AAMMA ATUARUK E-sport Nuummi sunngiffimmi sammisasssatut neqeroorutaalissasoq

Atassutip siulittaasuata Inatsisartunullu ilaasortap qarasaasiatigut pinnguaatit assigiinngitsut aamma soqutigisaqarfigai, taassuma Esportip timersuutitulli allatullu akuerisaanissaa ukiakkut ataatsimiinnermi siunnersuutigaa.

Taassuma Esport aqqutigalugu aningaasassarsiortoqarsinnaasoraa:

- Nunarsuaq tamakkerlugu maannakkut E-Sport-imik unammineq tupinnaannartumik qaffariartuaarami taavalu inuussutissarsiutigalugu allaat ingerlanneqalivissornikuulluni.

Taassumali Esportimik siusinissamik peqatigiiffiit klubbillu piulersussat aallartissinnaaniassammata aallaqqaasiutigalugu nunatta karsianit tapiissuteqarfigineqarnissaat kissaatigaa.

GIF: Naqqaniit aallarteqqaarlik

Peqatigiiffinnik klubbinillu maannakkut soqanngilaq.

Taamaammat nunatsinni timersoqatigiit kattuffiata suna tamarmi naqqaniit aallartinneqarnissaa unammisartullu katereqqaarnissaat siunnersuutigaa. Tamatuma kigorna ingerlariaqqittoqarsinnaavoq.

- Takoriartigut siunissami qanoq nunatsinni ineriartussanersoq. Sunaluunniit qulaaninngaanniit aalajangigaq arlaatigut ammut siuaruartinnera ajornakusoortartorujussuuvoq, taamaattumik Esportertartut isumaqarpunga nammineerlutik nunatsinni arlaatigut klubbiliortariaqartut imaluunniit namminneerlutik peqatigiiffiliuqatigiillutik ataatsimoorfigisinnaasaminnik, GIF-ip siulittaasua, Nuka Kleemann oqarpoq, nangillunilu:

- Nunatsinni timersornerneq silarsuaani taamaappoq, inuinnaat ataasiakkaat ataatsimooriarlutik peqatigiiffiliortarput klubbiliortarpullu, allatigullu siaruaallugu kattuffiliortarput.

AAMMA ATUARUK Nukappissat Nuummeersut: USA-mi Fortnitemik iluatsitsilluartut

Taamaammat taanna Esportimik peqatigiiffimmik klubbinilluunniit aallartitserusuttunut siunnersuuteqarpoq.

- Isumaqarpunga esportertartut aaqissuutaasumik peqatigiiffiliornissamik naqqaninngaanniik aallartittariaqartut. Arlaatigut klubbiliortoqassappat soorunami uagut aamma timersoqatigiit kattuffianinngaanniit siunnersuisinnaavugut qanoq ajornannginnerusumik qanorlu pitsaanerusumik ingerlariaqqittoqarsinnaanersoq.

Angajoqqaarpassuarnut qarasaasiatigut pinnguaatit meeqqat akunnerpassuarni qarasaasiatigut isiginnaarutip saaniittarnerat pissutigalugu nuannarivallaarneq ajorpaat. Taamaammat Esport sukisaarsaataaginnassanngitsoq, Nuka Kleemann isumaqarpoq.

Esport timersuutitut akuerineqassaguni qarasaasiap saniatigut timikkut aalanermik aamma peqarnissaat taassuma piumasariniarpaa.