Atassutip demokratii nukittorsarniarpaa

Taakku tassaapput siusinnerusukkut Atassummi siulittaasumut tulliusoq Steen Lynge, Atassutip inuusuttaani siulittaasoq Hans Lyberth, Inatsisartuni ilaasortaq Knud Kristiansen aamma siulersuisuunerni ilaasortaq Arnannguaq Blytmann, Aasianni ilinniarnertuunngorniarfimmi ilinniartitsisuusoq.

Taamaalilluni Atassummit qinigassanngortittut misilittagaqarluartunik inuusuttunillu ilaqartut, Atassutip pingaarnertut qinigassanngortitaa Steen Lynge oqarpoq.

- Pingaarnertut nunatta namminiilivinnissaanut sioqqutsisumik piareersarneq aallunniarparput. Tassa inuit ataasiakkaat illersussagutsigik, taava tunngaviusumik tamat oqartussaaneranni suleriaatsit nunatsinni eqqunneqartussat aallunniarpavut, Steen Lynge oqarpoq.     

Sunaliuna Atassutip qinigassanngortitaasa Folketingimut qinigaassagaluarunik sulissutiginiaraat. Aap, Nunatta namminiilivinnissamut aningaasarsiornikkuinnaq piareersimanani aammattaarli kulturikkut piareersimanissaa qulakkeerusuppaat.

Inuinnaat oqartussaanerannut kulturi nukittorsarneqassaaq - matumanilu Danmarki akisussaaffeqartoq, Steen Lynge oqarpoq.

- Danmarkip nunasiaateqarnikuunini aallaavigalugu aamma nunatta namminiilivinnissaanut ikiuuteqataasussaalluni pisussaaffeqartoq uagut isumaqarfigigatsigu. Nunatsinni uagut soorunami pisussaaffeqarpugut, paasissutissanillu nammineerluta aallertussaalluta. Kisianni nunasiaataasimasut namminersulivinneranni suut ajornartorsiutit aporfigineqarsinnaasut paasinissaat qulakkeerusuppavut, Steen Lynge oqarpoq.     

Atassutip qinigassanngortitassaminik saqqummiussineratigut partiit Inatsisartuni ilaasortaatitaqartut tamangajammik, Kattusseqatigiit Partiiat kisiat pinnagu, qinigassanngortitassatik saqqummiutereerpaat.

Partip siulittaasua Anthon Frederiksen Radioaviisimut oqarpoq, parti qinigassanngortitsissaguni qinigassanngortitassaminik suli aalajangiussinngitsoq.

Parti septembarip pingajuanni sisamaannilu ataatsimeersualerpat tamanna isummerfigineqassaaq.