Atassutip ataatsimeersuarnera ullumi aallartippoq

septembarip 09-at 2005 08:14

Partiip Atassutip ataatsimeersuarnera ullumimiit allartissaaq sapaat septembarip aqqarnat ilanngulugu ingerlanneqassalluni, ataatsimeersuarnermilu siulersuisuunernik qinersisoqalerpat massakkut siulittaasuusoq Augusta Salling sassaqqissanngilaq.

Aviisi Sermitsiami saqqummersumi allaaserineqarpoq Augusta Salling-ip Qeqertarsuarmi borgmesteritut sulinini aallulluarumallugu Atassummi siulittaasutut tunuarniartoq.

Finn Karlsen Atassummi siulittaasup tullia radioaviisimut oqarpoq siulittaasussamut nammineq sassassamaarluni.

- Ulloq manna tikillugu siulittaasumut sassartussanik saqqummertoqanngilaq, uangalu nammineerlunga qinigassanngortinnissara isertuunnianngilara isertortumik pissusilersorneq nuannarinnginnakku.

Finn Karlsen-ip Nunatsinni ullutsinnut naleqquttumik politikkeqartoqannginnera akuersaarnagu naleqqussaanissamullu peqataarusuluni Atassutip siulittaasussaatut qinigassanngortinniarpoq.

Finn Karlsen-ip aamma oqaatigaa allamik sassartoqarnissaa neriuutigingaluarini.

Atassutip ataatsimeersuarnera ullumi aallartillugu partiip programmiata nutarterneqarnera STI-ip aulaani saqqummiunneqassaaq, aqagu ataatsimeersuarnivittaa aallartissalluni.