Atassutip allatserisimassaa aningaasanik paarisanik tillissimasutut eqqartuussivimmi sisamanngornermi unnerluutigineqartoq suliap ingerlanneqarnerani pinngitsuunerartuarsimavoq. Toqqorsivimmit assiAssi: KNR

Atassutip allatsigisimasaa aningaasanik paarisanik tillittutut pinngitsuutinneqartoq

Atassutip allatsigisimasaata oqaluttaanermut 100.000 koruunit sinnerlugit aningaasarsisimanera inatsisaatsuliornerunersoq eqqartuussiviup uppernarsaatissaqartinngilaa.

138.000 koruunit.

Eqqartuussiveqarfik Sermersuumi sisamanngornermi suliami pingaarutilittut qitiupput. Suliamilu tassani Atassutip allatsigisimasaa aningaasanik paarisanik tillittutut unnerluutigineqarpoq.

Unnerluussisussaatitaasut oqarnerat naapertorlugu pineqartup inatsisinik unioqqutitsisumik aningaasat 2016-imi januaarimit 2017-imi marsimut imminut akiliutigisarsimavai.

Aningaasat qaammatit tamaasa oqalutsimut tapitut akiliutigineqarsimapput, taakkuli partiip siulersuisuinit akuerineqarsimanngitsut, unnerluussisussaatitaasut oqaatigaat.

Partiilli allatsigisimasaata inatsimmik unioqqutitsisimanerarneqarnera uppernarsaatissarsinngilaa, taamaammat pinngitsuutinneqarpoq.

Unnerluutigineqartoq suliap ingerlanneqarnerani pinngitsuunerartuarsimavoq.

2017-imi unnerluutigineqartoq

Suliaq Siverth K. Heilmannip Atassummi siulittaasutut atuutilernerani aallartippoq. Taassuma partiip allattaanut tapinik pasinartoqartoq paasivaa.

- Apeqqutikka (partiip allattaata aaqq.) oqaatsitigut allakkatigulluunniit akisinnaanngilai, taamaammat politiinut unnerluutigineqarnissaa innersuussutigaara, Siverth K. Heilmann eqqartuussivimmi nassuiaavoq.

Partiilu unnerluutiginnippoq.

Ukiuni tapinik tunniussiffiusartuni Siverth K. Heilmannip siulerisaa Knud Kristiansen Atassummi piffisap annerpaartaani akisussaasut qullersaraat.

Tapit qaammatit tamaasa akiliutigineqartartut katillugit 138.000 koruuninik naleqarput.

Taakkulu Knud Kristiansenip akuerisimallugit eqqartuussivimmi sisamanngornermi nassuiaatigaa.

- Ulluinnarni aqutsisunut saqqummiutinngilakka, nammineq siulittaasutut iliuuseraara, Knud Kristiansen eqqartuussivimmi oqarpoq.

Tamanna taassuma siulittaasutut 2017-imi januaarimi tunuanngitsiarnerani pivoq.

Ukiup affaa qaangiuttoq 2017-imi juunimi Atassutip siulersuisuisa partiip kukkunersiuisui ataatsimeeqatigai, tassanilu partiip allattaanut oqalutseqarnermut tapit oqaluuserisassaniipput.

Partiip tapit tassani akuersissutigaat, tamatumali kingorna Siverth K. Heilmann partiimi siulittaasunngorpoq. Partiillu allatsigisimasaa 2017-imi decembarimi unnerluutigineqarluni.

Illersuisoq: Arlaannik pissusissamisut iliortoqarsimanngilaq

Lars-Christian Sinkbækip, suliami illersuisuusup suliap inernera ilorrisimaarutigaa. Taassuma oqarnera naapertorlugu aalajangiineq partiip aqunneqarneranut tunngatillugu takussutissiivoq:

- Partiip aqunneqarnerani unammillernartoqangaatsiarpasippoq, partiillu iluani tamanna pillugu naammattumik attaveqatigiittoqanngitsoq uppernarsarneqarpoq.

- Arlaannik pissusissamisut iliortoqartarsimannginneranut takussutissaavoq. Illersugarali tassunga akisussaatinneqarsinnaangilaq, illersuisoq aalajangiinerup kingorna oqarpoq, nangillunilu:

- Pisortarisaminit qaninnerpaamit neriorsuiffigineqarpoq, taassumalu siulittaasup ulluinnarni aqutsisunut aamma akuersititsinissaq isumagissagaa tatigaa.

Unnerluussisussaatitaasut suliamik suliassanngortitseqqissanerlutik eqqarsarfissaqarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat