- Eqqarsarluareerlunga uani ataatsimiitsitaliami atsioqataarninni misigigama uummatiga malissimanagu, Atassutip siulittaasua KNR-imut oqarpoq.Assi: KNR

Atassutip ajunngitsorsianut akileraarnissaq itigartitsissutigaa: Utoqqatsissuteqareerpunga

Qanoruna iliorsimasunga, Aqqalu Jerimiassen akeqanngitsumik ajunngitsorsiat akileraarusernissaannut atsioreerluni eqqarsarpoq. Inatsisissatut siunnersuut - ataatsimiititaliami ataatsimiinnermilu maanna oqallisigineqaqqissaaq.

Atassutip siulittaasua, Aqqalu Jerimiassen Inatsisartut ataatsimiittarfianni oqaaseqartarfimmit ippassaq oqaaseqarmat tupaallaatigineqarpoq.

Taassuma partiimilu suliffeqarfiit sulisuminnut akeqanngitsumik ajunngitsorsiatut periarfissarititaannut akileraartitsisarnissamut siunnersuutip ilaanut tapersiinini tunuartikkaa tassani nalunaarutigaa.

Taakku assersuutigalugu tassaasinnaapput internetti, oqarasuaat angalanerillu.

Siunnersuut politikerit ukiakkut ataatsimiinneranni ippassaq aappassaaneerneqartussaavoq, partiillu suli inissisimarrannerlutik ilisimagaluarpaat. Atassulli isumaminik allanngortitsivoq.

Aqqalu Jerimiassenip nalunaaruteqarnerata tupaallaatigineqarneranut pissutsit marluupput:

Siullertut siunnersuut Inatsisartut Aningaasaqarnermut Akileraartarnermullu ataatsimiititaliaani oqallisigineqarmat akueraa aappassaattullu naalakkersuisoqatigiinnut ikorfartortaavoq.

Atassutip siulittaasuata isumaminik eqqortumik nalunaaruteqarninin kingusittoq nassuerutigaa. Taanna ataatsimiititaliap siunnersuummik aappassaaneerinissamut ingerlatitseqqinnerani kukkunermik erngertumik misigisimalluni nassuaavoq.

- Eqqarsarluareerlunga uani ataatsimiitsitaliami atsioqataarninni misigigama uummatiga malissimanagu, Atassutip siulittaasua KNR-imut oqarpoq.

Anguniakkanut akerliunera akueriuminaappallaartoq

Aqqalu Jerimiassen partiitut ikorfartortaasutut naalakkersuisoqatigiit siunnersuutaat taperserusuppaa. Taamaaliortoqartussanngormalli anguniakkanut aakerliusoqarnera akueriuminaappallaarpoq.

Naalakkersuisut inatsisissatut siunnersuummut oqaaseqaateqarnerminni inuit amerlanertigut akissarsiakkaat akeqanngitsunik ajunngitsorsisartut oqaatigaat. Taamaammat siunnersuut aningaasaqarnikkut aamma naligiinnerusoqarnerulersitsiniarneruvoq.

Politikkilu taanna Atassutip tapersersinnaanngilaa.

- Atassutip anguniagaanut assortortumik iliuuseqarsimallunga misigigama, uagut peqataaffigisinnaanngilarput.

- Taamaattumillu nassuerutigisariaqarsimavara Atassutip politikkianut assortortumik peqarusunata, Aqqalu Jerimiassen oqarpoq.

Ataatsimiititaliami atsioqataavutit. Sooruna aatsaat ataatsimiittarfimmi akuersiunnaarnerit oqaatigiviuk? Kingusinaarsorinngiliuk?

- Inersuarmi utoqqatserpunga oqarlungalu pissuserissaarnerunngittoq taamaaliorneq, sivisunaarnerullunga iliorsimasinnaagaluarpunga tassami iisinnaanngereerlugu nalunngereeraluarpara taanna iliuuseq.

Aallaqqaammut partiitut ikorfartortaanersi pissutigalugu akuersivusi, kisianni anguniakkassinnut akerliunera akuersaarsinnaajunnaarlugu. Atassut ikorfartortaasutut nalinginnaasumik naapeqatiginninniarpallaartoq isumaqarpit?

- Taamatorsuaq suleqatigiinnitsinnut innarliissasoq naatsorsuutiginngilara, uagut tunuliaqutissiisutut inissisimavugut.

Siunnersuut ataatsimiititaliamut utertinneqassasoq

Atassutip nalunaaruteqarnerata suliap ingerlanera sunniivigissavaa. Inatsisissatut siunnersuut Aningaasaqarnermut Akileraartarnermullu ataatsimiititaliamut utertinneqarluni oqallisigineqaqqissasoq, ataatsimiiitaliap siulittaasuata, Naleqqamit Jens Napaattuup oqaatigaa.

Siunnersuullu tamatuma kingorna Inatsisartuni aappassaaneerneqaqqissalluni.

- Ataatsimiitsitaliamut uterteqqittariaqarnernut kinguneqarpoq, taamaammat aappassaaneeneranik unikkallarluni maannakkut nutaamik isumaliutissiissummik sanasariaqarluta inissippugut, taannalu naammassippat Inatsisartunut tunniuteqqissavarput aappassaaneerneranut nangilluni ingerlaqqissaaq tassanngaanniit.

- Eqqumiilaartumik pisoqassaaq, isumaliutissiissummik ikinnerussuteqaraluarluta Inatsisartuni eqqunneqarpat tassani amerlanerussuteqaqalaarluta ataasinnguamik Inatsisartuni ataatsimiitsititaliami ikinnerussuteqaraluarluta innersuussaq malillugu Inatsisartuni amerlanerussuteqarluta akuerineqarluni inississaaq, Jens Napaattooq oqarpoq.

Taassuma Atassutip allamik isummernera qaqutigoortuummat ajornartorsiutaarujussuartutut isiginngilaa.

- Taamatut inissittaartoqaannassappat suleqatigiinnermut ilungersunartuussaaq, ingammik aalajangigassat annertuut taamatut inissittassappata imaannaanngitsuusinnaavoq.

- Kisianni ataasiakkaani taamatut inissitoqarnera partiip ikorfartortaasup nammineq pisinnaatitaaffigivaa, Jens Napaattooq oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl