Atassut:75 procentit nunatsinnut tuttariaqarput
Nunatsinni uuliamik nassaartoqassappat iluanaarutaasut kikkunnut tutsinneqarnissaat oqallisaaleruttorpoq. Iluanaarutaasut tamakkerlutik nunatsinnut tutsinneqartariaqartut qinikkat arlallit isumaqarput. Iluanaarutilli nunatsinnut tutsinneqartariaqarnerannut, Atassutikkut isumaqataagaluarlutik, naammagittarnerupput.
Nunatta uuliaqarsinnaanera pillugu tusagassiuutinut allakkamini Atassutip siulittaasua Finn Karlsen allappoq, aatsitassat pillugit nunatta Danmarkillu akornanni nutaamik isumaqatigiissuteqartoqarnissaanik
Atassut ukiut sisamat imaluunniit tallimat qaangiummatali piumasaqarsimasoq, tassa iluanaarutaasut avinnagit 75 procentilli nunatsinnut tutsinneqartalernissaat Atassummit piumasarineqarsimasoq.
- Tamanna pisariaqaleraluartoq suli anguneqanngilarput. Nunatsinni aatsitassarsiortut siunissami annerusumik piumasaqarfigilertariaqarpagut, aatsitassanimmi annissuiinnarnermut isiginnaaginnarsinnaanngilagut, Finn Karlsen allappoq.
Uuliaqassappat iluanaarutissat qanoq pineqarnissaannik ukiumoortumillu aningaasaliissutit ikilisarneqarnissaannik oqaluttut Finn Karlsenip aamma oqaaseqarfigai.
- Naalagaaffeqatigiinneq paaseqatigiiffiulluartumik ingerlaqqissappat, amerikamiut Pituffimmik atuinerannit danskit iluanaarutitik, NATO-milu ilaasortaanerminnit iluanaarutitik pillugit kalaallinut toqqaannartumik ilisimatitsisariaqarput, Finn Karlsen allappoq.
