ATASSUT Tasiilaq: Jakob Sivertsen qinigassanngortissanngilaq

ATASSUTip qullersaqarfia piffissami kingullermi saaffigineqallattaarpoq Jakob Sivertsenip ”qinigassanngorteqqilernera” pillugu.

Jakob Sivertsen qinigassanngorteqqinniarani sapaatip akunnerani kingullermi nalunaarpoq, imigassartorsimalluni timmisartumut Kulusummukartumut ikeqqusaannginnami kamassimavoq, taamaalilluni Kangerlussuarmi isertitsivimmiitinneqarnermi kingorna qinigassanngorteqqinniannginnini nalunaarutigalugu.

Partiimi siunnersorti, Silas Kleist, naapertorlugu inunnut suliffeqarfinnullu assigiinngitsunut Jakob Sivertsen saaffiginnittarsimavoq ATASSUTip Tasiilami immikkoortortaqarfiani siulersuisunit aamma ATASSUTip qullersaqarfianit taperserneqarluni qinigassanngorteqqinniarluni.

ATASSUTip immikkoortortaqarfiani siulersuisut nalunaarput Jakob Sivertsen qinigassanngortissallugu pilersaaruteqaratik, tamannalu aamma piviusunngornavianngitsoq.

Qullersaqarfimmiit oqaatigineqarpoq, Jakob Sivertsenip oqaatigisarsimasaanut Tasiilami tapersiisoqarsimanngitsoq, tamannalu aamma pilersaarutigineqanngitsoq, Tasiilamilu immikkoortortaqarfimmi siulersuisut Jakob Sivertsen Tunumut angerlarluni apuummat ulloq manna tikillugu suli oqaluussimanngimmassuk.

Jakob Sivertsen ulloqeqqata siuninngua attaveqarfiginiaraluaratsigu iluatsitsinngilavut.

ATASSUTip qinersinissamut pilersaarutini kikkullu qinigassanngortissanerlugit Nuummi ualimut ilisaritissavai, tusagassiortunik katersortitsinertalimmik, unnugulu Radioaviisimi tamanna annertunerusumik tusagaqarfigisinnaassavarput.