Atassut: Siumumiit aporaakkumavallaarput

Jakob Janussenip Siumut sakkortuallaamik oqaluttarfimmi oqaluttartoq ippassaq oqaatigaa.

Gerhardt Petersenip isornartorsiummut tapiliullugu oqarpoq, Siumut naaperiaarusunngippallaartoq aporaakkusuppallaartorlu.

- Uagut partiitut qinikkat kikkuugaluartulluunniit ataqqivagut, taamaattumik akerartuerpalaartumik nipeqarnissat nuannarineq ajorpagut. Taamaattumik taama isornartorsiuisoqarnera ilisaraarput, Atassutip siulittaasua Gerhardt Petersen taama isumaqarpoq.

Taanna isumaqarpoq Siumukkut aporaannissaq pingaartinnerusimagaat:

- Uanga isumaga malillugu Siumukkut aporaakkusunnerusarsimapput, uagulli Atassummiit politikkikkut anguniakkat pillugit oqaloqatigiinnissat pingaartittarsimallutigit.

Atassutip ataatsimiititaliat soqutigisatik pisinnaannginneri pillugit Siumullu inatsisartuni teknikkikkut imminnut suleqatigiikkunnaarput.

- Taamaatinnitsinnut pingaarnertut oqaatigisinnaavarput, uagut ataatsimiititaliani pingaartilluinnakkagut tassani ilaasut pisinnaasimannginnatsigit. Ilaatigut aamma tupinnanngitsumik Siumut tungaaninngaanniit pingaartitagut pingaartissimagaat. Taamaalilluta suleqatigiinnerput kipisittariaqartsimavarput, Gerhardt Petersen oqarpoq nangillunilu:

- Aatsitassanut ataatsimiisitaliaq pilersinniarneqartussaq upernaaq siunnersuutigineqarsimavoq, ilaasortassap aappaa uagutsinnut tunniunneqarsinnaasoq. Taannalu pisinnaasimanngimmat suleqatigiinnerput tassunga kipisittariaqarsimavarput.

Gerhardt Petersenilli oqaatigaa, siunissami Siumut suleqatigisinnaallugu.

- Siumut suleqatiginikuuarput, aamma soorunami matu matorlunnagu pivugut, Gerhardt Petersen oqarpoq.

Tassalu maannakkut Atassut aatsitassanut ataatsimiisitaliami ilaasortaatitaqalerpoq, soorluttaaq inuussutissarsiornermut aammalu aalisarneq, piniarneq nunanerinerlu ataatsimiisitaliami ilaasortaatitaqalersut.