Atassut Siumukkunnit ataatsimeeqatigeqqinneqassaaq

Inatsisartunut qinersinerup kingorna Siumukkut partiinut isumaqatigiinniarnissamik pissarsisut illuatungaanilu IA-kkut Demokraatillu naalakkersuisunngortitsisinnaanerannut Atassut aalajangiisuulluinnartussatut inissippoq. Atassut Siumukkunnut ullumi kaffisoriartoqquneqarpoq. Kaffisoqatigiinnermi Naalakkersuisunngortitsinissaq immikkut sammineqanngilaq, Atassutip siulittaasua Finn Karlsen, Siumukkunnik ataatsimeeqateqareersoq ima oqarpoq:

- Tassa unnuaq KNR TV –miinitsinni Siumup erseqqissumik oqarfigivaatigut ullaakkut qulinut oqaloqatigiumalluta, soorunami taanna akuersaarparput.

Finn Karlsen aamma oqaropq Atassutip Siumullu ullumi ataatsimeeqatigiinneranni Atassummit erseqqarissumik oqaatigisimagini partiinit allanit aamma qaqquneqarnissamut ammalllutik. Taamaattorli partiit allat Atassummut suli qaaqqusisimanngillat.

Finn Karlsen-ip naatsorsuutigilluinnaqqissaarnerarpaa Siumukkut kisimiillutik naalakkersuisunngorsinnaanngitsut ilassasioqqaartariaqassasulli.

- Taava illuatungaani Inuit Ataqatigiit Demokraatillu naalakkersuisunngortitsinissaminnut aamma amigarput, taamaattumillu ilassasiortussaagamik oqareerlutillu Siumukkut attorniarnagit, tamanna pillugu uagut qaaqquneqarnissatsinnut aamma piareersimagaluarpugut. Manna tikillugu qaaqquneqanngilagut oqarfigineqaannarlutali uagut qaaqqusisariaqartugut. Isumaqarpunga IA Demokraatillu naalakkerasuisunngorusukkunik aamma qaaqqusariaqaraatigut.

Atassut Siumukkunnut ullumi kaffisoriarmat neqerooruteqartoqarsimanngitsoq Atassutip siulittaasua oqarpoq.

- Taamaallaat oqaloqatigiissutigaarput periarfissaqarnersoq misissussagipput, qineqqusaarutigut misissoqqissaarneqassasut naapiffigineqarsinnaassanersut, isumaqatigiinniartoqassappallu suut isumaqatigiinniutigineqarsinnaanersut.

Atassutip ulluinnarni aqutsisui, inatsisartunullu ilaasortaavi suli Nuummut tikissimanngimmata sulilu oqaloqatigineqanngimmata isumaqatigiinniartoqalinngitsoq Finn Karlsen erseqqissaavoq.

Inuit Ataqatigiit Demokraatillu ullumi nalunaaqutaq marlunut pingasunullu Siumukkunnit kaffisoriartoqquneqarput. IA kransekagetoqatigineqarsimapput, Demokraatillu kageerartoqatigineqarsimallutik. Taamaattorli IA Demokraatillu Siumukkunnit kaffisoriartoqqoqqinneqarsimanngillat. Atassut aqagu ualikkut Siumukkunnut kaffisoriartoqqissapput.

Inatsisartuni amerlanerussuteqartut naalakkersuisuusarput, tamaattorli ikinnerussuteqartut naalakkersuisunngortitsisinnaanerat inatsisitigut aamma periarfissaqartinneqarpoq.