Atassut: -RG ernumanartoqarpoq!
Namminersornerullutik Oqartussat suliffeqarfissuaataata Royal Greenlandip naatsorsuutai kingulliit aallaavigalugit suliffeqarfissuup niuernikkut ineriartortinneqarnissaanut periaatsit pillugit
Naalakkersuisut qanoq isummersuuteqarnersut qanorlu naatsorsuutigisaqarnersut maanna partiip Atassutip ujartulerpaa.
Atassut allappoq Royal Greenland A/S-ip naatsorsuutitigut 2005-imut 06-imullu angusai pillugit suliffeqarfiup avammut saqqummiutaani kaaviaartitat 768 mio. koruuninik amerleriarsimagaluartut, taamaattorli akileraarut peernagu suliffeqarfissuup sinneqartoorutai 65 mio. koruuniusimasut naak siorna sinneqartoorutit amerlanerullutik 131 mio. koruuniusimagaluartut. Atassutillu allagaqaammini tikkuarpaa angusaasimagaluartut 81 mio. koruuninik ajorseriaateqarsimanerat.
Tamakkulu tassa tunngavigalugit aalisakkerivissuup siunissaa maanna Atassutip ernummatigisorujussuanngorpaa, tassamigooq Royal Greenland arlaleriarluni kalerrisaarisarmat nunatsinni suliffissuarnik ingerlatsineq akisuallaartoq ingerlatsinermullu aningaasartorpallaarluni.
Atassutillu apeqqutit arlallit Naalakkersuisunut apeqqutigai, ilaatigut aperivoq nunani allani suliffissuaqarnera tassatuaanersoq suliffeqarfissuup sinneqartooruteqartarneranut aallaaviusoq. Taamatuttaaq Atassut Naalakkersuisunut qinnuiginnippoq ilisimatitsissutigeqqullugu qalerallit suliffeqarfissuup nammineq pisarisai aammalu aalisartunit pisiai qanoq annertutigisut nunatsinni suliarineqartarnersut.
