Atassut qinersinissamik aalajangiusseqqavoq

Inatsisartut aqagu katersuutissapput, Siumullu naalakkersuisuutitaqartut tunuinnarlugit naalakkersuisuungortitsinissamut inatsisartuni partiit allat inatsisitigut periarfissaqarput. Demokraatit Kattusseqatigiillu qinersisitsisoqarnissaanik aalajangiussipput, Demokraatilli isumaqarput aningaasanut inatsisissaq qinersinissaq sioqqullugu akuerineqartariaqartoq, Atassutip tamanna peqataaffigerusungilaa siulittaasoq Finn Karlsen oqarpoq:

-Isumarput allanngortinngilarput siulliulluta qinersinissamik piumasaqartuusimagatta. Piumasaqarnitta kingorna pissutsit pitsanngoriartunngimmata Naalakkersuisut siulittaasuata qinersinissamik suaaruteqarmat nuannaarluata oqapugut.

Aningaasanut Inatsisissap isumaqatigiinniutigineqarneranut atatillugu partiit Inuit Ataqatigiit Demokraatit Atassullu isumaqatigiittutut saqqummiunneqarnerat eqqunngitsoq Finn Karlse erseqqissaavoq.

- Partiit allat isumaqatigiinniarnikuunngilagut Naalakkersuisulli isumaqatigiinniarnikuullugit. Aningaasanut Inatsisissaq ullormi ataasiinnarmi suliarineqarsinnaanngilaq.Taamaattumik massakkut tusatsiakkaka tassalu allatut eqqarsaatersortoqarnera tupigisupilussuuvara. Inatsisissaq inuiaqatigiinnit paasineqarnikuunngilaq, Inatsisartullu aningaasaqarnermut ataatsimiititaliaannit aamma suliarineqarnikuunngilaq, taamaattumik aqagu akuersissutigineqarnissaa piumasarineqassappat tupigisupilussuussavara.

Finn Karlsen aamma oqarpoq utaqqiisaasumik Aningaasanut Inatsisissamik akuersisariaqassallutik, qinersisoqareerpat nutaamik inatsiliortoqarniassammat.