Atassut Qaanaami ikilivoq

Qaanammi Atassut sinnerlugu kommunalbestyrelsemut qinigaasartut ukiuni kingullerni marlunni tunuartartut aappassaat ullumikkut Atassummit tunuarluni nalunaarpoq.

Atassut tunuliaqutaralugu Qaanaami kommunalbestyrelse-mi ilaasortaq Panigpak Daorana Atassummiit tunuarpoq.

- Qaanaap kommuniani Atassut tunuliaqutaralugu qinikkatut inissisimavunga, ullorli manna tikillugu Atassutip siulersuisuinit taakkartortakkakka tusaaniarneqarneq ajorput, allaat ataatsimeeqatiserinnittarnerigaluakka tusaanngitsuusaarneqartarlutik. Tamanna tapersersorneqannginnertut isigigakku tunuartariaqarlunga aalajangerpunga, Panigpak Daorana radio aviisimut taama oqarpoq.

Taanna allakkamini aamma nassuiaavoq, Qaanaami kommunalbestyrelsemut qinersereernerup kingorna anguniagassatut isumaqatigiissutaasut pitsaasut ilaat, nerriviulli amusartuanut iliinnarneqarsimasoq, aningaasartuutissanik tulleriiaarisoqalernerani eqqartorusussimagaluarini tusaanngitsuusaarneqarsimallunili.

Taamatuttaaq piniartut atugarisaat inuussutissarsiutitigullu siuarsaanissaq pingaartissimagini erseqqissaatigaa.

Panigpak Daorana maanna attaviitsutut inissisimalerpoq, suleqatiginnikkusuttunillu saaffigineqareersimanini erseqqissaatigaa.

Siornatigut aamma Atassut sinnerlugu Qaanaami kommunalbestyrelsemi ilaasortaasimasoq Naimangitsoq Petersen Atassummiit tunuarsimavoq.