Atassut: Piviusut Jens B. Frederiksenip toqqorterpai

Jens B. Frederiksen, sapaatip akunnerani uani siusinnerusukkut oqarpoq, ineqarnermut akiliutit 50 procenti sinnerlugu qaffanneqarnissaannut inigisat aserfallatsaalinissaannut aningaasanik amigaateqartoqarnera pissutaasoq.

Nassuiaalli taanna Atassutip upperinngilaa.

- Utaqqiisigalugu inigisani, inigisanut nalinginnaasunut sanilliullugit ineqarnermut akiliutit INI A/S-ip pingasoriaammik akisunerutittarpai, naak inigisat angeqatigiikkaluartut, Atassummi politikkikkut siulittaasup tullia, Steen Lynge, oqarpoq, nangillunilu:

- Taamaammat ineqarnermut akiliutit Kalaallit Nunaat tamakkerlugu INI A/S-ip qaffattariaqarpai, Naalakkersuisummi namminneq sulisuminnut Nuummi Tuapannguani ineqartitsinissaminnik pilersaarutaat iluatsippata INI A/S koruuninik millionerpassuarnik annaasaqassaaq. Tassalu imaappoq Naalakkersuisut sulisuminnut ineqartitsilernissaat attartortut nalinginnaasut aningaasalersussavaat, Steen Lynge oqarpoq.