Atassut paggaliuuppaat

Atassutip siulersuisuinut ilaasortat Elisabeth Fleischer aamma Kristian Jerimiassen Nuummut maanna ingerlaarput. Tikippata Atassut ataatsiissaaq. Ataatsimiinneq soorunami naalakkersuisuliornissamik imaqassasoq, Atassutip siulittaasua Finn Karlsen oqarpoq. Atassut Siumullu ualeru naapeqqinniarput Inuit Ataqatigiit Demokraatillu ualeru ataatsimeereerunik aamma qaaqqusilersaartut Finn Karlsen oqarpoq. Sumulli maanna killippugut, isumaqatigiinniarnerit aallartereerpat? Finn Karlsen ima akivoq:

- Isumaqatigiinniarnerit aallartinngillat, oqaloqatigiinnerit aallartipput taamaallaat.

Atassut qinersinerup kingorna aalajangiisuulluinnartussatut inissippoq, tassa Siumut illuatungaanilu IA Demokraatillu naalakkersuisuunngortitsiniarneranni oqimaaloqutaasussanngorluni. Tamanna Atassutip qanormita tiguaa? Finn Karlsen akivoq:

- Nuannerpoq aamma pikkunarpoq. Ulloq qinersineq ilanngullugu Atassut ikittuarannguanaannarnik isertitsisoqarnissaa ilimagineqarpoq, naalakkersuisunngortitsinissamilu naatsorsuutigimneqarsinnaajunanngitsoq oqaatigineqartuarpoq. Tamaammat qinersineq naammassimmat Atassut avaqqunneqarsinnaanngitsoq paasineqarpoq. Pinngitsoorneqarsinnaanngitsutut oqaatigineqarsinnaavugut.

Taama inissisimalernertik Atassutip soorunami atorluassagaa Finn Karlsen oqarpoq.

- Naalakkersuisunngortitsinissamut tunngatillugu arlaat naalakkersuisunngoqatigissagutsigit nutaaliornissamut piumassuseqarpugut.

Atassut suli neqeroorfigineqarsimanngilaq.

- Neqeroorfigitissinnaannginnatta, tassa Siumukkut illuatungaanilu partiit pingasut suleqatigiilissappata, ataasiakkaarluta oqaloqatigeeqattaarnissaq pissusissamisoorsorinngilarput, naalakkersuisooqatigiinniassagutta pingasuulluta naapittariaqarpugut, immikkut ataasiakkaarluta naapikkaluarutta iluaqutaanaviannginnami.

Atassutip siulersuisui ullumi ataatsimiigiaqquneqarput ataatsimiinnerli oqaloqatigiinnermik ippassarlu isumasioqatigiissimanerup nanginnerissagaa Finn Karlsen oqarpoq.

- Isumasioqatigiippugut, qineqqusaarutitsinni suut naapiffigineqarsinnaappat. Suut aporfiusinnaappat. Taamatut ingerlasussaassaaq, oqaloqatigiissutigineqassapput suut qanippat, suut ungasippat.

- Soorunami qaninnerit suleqatiginiassavagut, allannguinissamut ilungersuuteqaratta. Nunatta aqunneqarnerani inuussutissarsiornikkut allatigullu nutaaliornerput atorluarniarparput.

Siumukkut ualeru tallimat qaaqqusinerat Atassummit tikilluaqquneqartoq Finn Karlsen oqarpoq. Ataasimeeqatissalli neqerooruteqarsinnaanissaat Finn Karlsen-ip iluamik ilisimasaqarfiginnginnerarpaa. Taamaattorli oqaloqateqarnissat oqaloqatigiinnerinnaagaluarpataluunniit piusassani Fin Karlsen-ip erseqqarinerarpaa:

- Partiit kikkulluunniit naalakkersuisooqatigilissagaluarutsigit tunuliaqutai ataatsimoorluinaqqissaartariaqarput, tassa piumasassarput siullerpaaq. Tamanut oqaatigineqassaaq, aamma uagut ataatsimoorluinnaqqissaartariaqarpugut naalakkersuisooqatigiinnissaq eqqarsaatigalugu, inatsisartut iluanni avissaartuuttoqassanngilaq.

Radioaviisimit Atassutikkut allaffianut apersuiartornitasinni Naalakkersuisuungallartut Siulittaasuat Hans Enoksen Finn Karlsen-ip allaffianit anisorlu iserpugut, isersimanitsinnillu Atassut Demokraatinit IA-millu qaaqqusissummik allagarsimavoq.