Atassut Nuuk tusaaginnarsinnaajunnaarpoq

Atassutip Nuummi immikkoortortaqarfiata Inatsisartunut naalakkersuisunullu ammasumik allagaqarluni kajumissaarutigaa, Naalakkersuisunut ilaasortaasimasut Namminersornerullutillu Oqartussani pisortat pisortaasimasullu akikinaaralutik illusisimasut akisussaatinneqartariaqartut, illusiaminnillu utertitsisinneqartariaqartut.

- ATASSUT NUUK-mit isumaqarpugut illut pineqartut pisisuilu pillugit misissuisitsinerit nalilersuisitsinerillu amerlanerit piffissartorfigineqartariaqanngitsut, taama ATASSUT NUUK sinnerlugu siulittaasoq Jensine Berthelsen aammalu Siulittaasup tullia Ove Thomassen allapput.

Allakkami naalakkersuisuusimasut marluk saassutaarineqarput tassaasut Jørgen Wæver Johansen aammalu Johan Lund Olsen.

- Taakku imminnut iluaqutissinniarsimanerat akuersaarneqarsinnaanngilaq Inatsisartunit tunuarnissaat pillugu sakkortunerpaamik kaammattorneqartariaqarput illullu ”pigilersimasaat” pillugit isumaqatigiissutit atorunnaarsinneqartariaqarput illullu utertillugit, ilaatigut allakkat taama imaqarput.

Taamatuttaaq pisortaasimasunut pisortanullu tunngatillugu assinganik aamma oqariartuuteqarput.

- Inuinnaat attartortumiit piginnittumut aaqqissuussinermi periarfissatsiarsuat inuit pineqartut sequtserpaat allaat ullumikkut aaqqissuussineq taanna unittoortissimallugu, Jensine Berthelsen Ove Thomassenilu ilaatigut taama allapput.

Allakkat atuarlugit sakkortuginartunik imaqarmata attartortumiit piginnittumut aaqqissuussineq tamaanga killeqarsorinanngilaq.