Atassut: Nunaqarfiit sakkortuumik eqqugaassapput

Siumut akerliunerminik ingerlaannarluni nalunaarpoq, maannalu partiit illuatungiliuttut aappaat Atassut isornartorsiuisunut ilannguppoq. Atassutip siulittaasua Gerhardt Petersen Sermitsiap nittartagaanut oqarpoq, nunaqarfiit sakkortuumik eqqugaassasut, tamannalu Atassutip peqataaffiginavianngikkaa.

Tamatumani pineqarpoq, Naalakkersuisut nunaqarfinni sanaartornermut 45 millionit koruuninik sipaarniuteqarniarnerat, aningaasat illoqarfinni atorneqarniassammata.

- Taamatut sipaarniuteqarneq tapersersorsinnaanngilarput. Nunaqarfinni sipaarniarfiusinnaasunik qularnanngilaq nassaartoqarsinnaassammat, taamaattorli 45 millioninik sipaarniarfigineqarnerat ingasagaarput, Gerhardt Petersen oqarpoq.

Inuutissarsiornikkut ineriartornissamut periarfissarissaartunik nunaqarfeqarmat puigussanngilarput, taakkulu sanaartornikkut tapersersersorneqartuartariaqarput. Aamma sanasut isorliunerusuniittut suliassanik amigaateqartarput, sipaarniutissatullu siunnersuutigineqartumit taakku eqqugaassapput, Atassutip siulittaasua Sermitsiap nittartagaanut oqarpoq.

Kommunini allaffissornermut 36 millionit koruuninik sipaarniartoqarnera Atassutip aamma isumaqatiginngilaa.

- Akisussaaffinnik tigusinissamut kommunit piareersaleruttorput, suliassarlu maanna kinguaatoorfioreerpoq, kinguarsaasoqaqqinnissaalu ernummatigaarput, Gerhardt Petersen naggasiivoq.