Atassut: Namminiilivinnissaq pillugu isumaqatigiinnginniarluta isumaqatigiippugut
Naalagaaffeqatigiinneq imaluunniit namminiilivinneq.
Apeqqut taanna Atassutip tapersersortaaginnarluni Inuit Ataqatigiit Nalerarlu naalakkersuisoqatigilinnginnerannut aalajangiisuuvoq.
- Inatsisartuni kiffaanngissuseqarnerusunmik sulerusukkatta tapersersortaaniarluta aalajangerparput.
- Namminiilivinnissaq naalagaaffeqatigiillu pillugit isumaqatigiinnginniarluta isumaqatigiippugut, Atassutip siulittaasua, Aqqalu Jerimiassen oqarpoq.
AAMMA ATUARUK Ataatsimut isigalugu: Naalakkersuisunut ilaasortat nutaat aaku
Atassutip nunarput naalagaaffeqatigiinni ilaatikkusuppaa, qinersinermilu qinigaanerpaap IA-p minnerusullu Naleqqap piffissap ingerlanerani namminiilivittoqarnissaa kissaatigalugu. Tamannalu naggaterpiaani aalajangiisuuvoq.
Isumaqatigiinniarnerit naggaterpiaanut ilaasoq
Inuit Ataqatigiit qinersinermi taaguunneqarnerpaavoq, Inatsisartunilu qinigaaffinnit 31-nit aqqaneq-marlunnik qinigaatitaqarluni. Taamaammat partiip siulittaasua, Múte B. Egede Naalakkersuisuni siulittaasunngorsinnaaniarluni suleqatissarsiortariaqarpoq.
Atassutip Naleraq peqatigalugu isumaqatigiinniarnerit naggaterpiaanut ilaavoq, Atassutillu siulittaasuata partiitut ikorfartortaasutut inissisimalernissani ilorrisimaarutigaa:
- Naalakkersuisunit peqataanermit Inatsisartuni suliassanut suleqatigiikkusunneruvugut.
- Taamaammat immikkoortut aalajangersimasut suleqatigiissutiginissaat soorlu peqqinnissaqarfimmut, akiliisitsisarnermut susassaqarfimmut atugarissaarnermullu pitsanngorsaanissamut tunngatillugu isumaqatigiittarniarluta aalajangerparput.
AAMMA ATUARUK IA Nalerarlu Naalakkersuisut tullissaanik ilusiliissasut
Innuttaasut pisortanut akiitsui soorlu akileraarnikippallaarnermi akiligassat, ineqarnermullu akiligassat kommuninit isumagineqartarnikuupput. Allanngortiterisoqarneratigulli eqiterinerullu kingunerisaanik Namminersorlutik Oqartussat suliassaq taanna 2008-mi tiguaat.
- Naalakkersuisoqatigiinnissamut isumaqatigiissut nuannaringaatsiarparput. Assigiinngitsorpassuarni Atassutip isumaa assigaa, Aqqalu Jerimiassen oqarpoq.
Tunngaviusumik inatsisissaq pillugu isumalioqatigiissitaq isumaqatigiissutaasunut ilaavoq.
Isumalioqatigiissitamit nunatta namminiilivinnissamut tunngavissaanik inatsisissatut siunnersuusiornissaa siunertaavoq.
- Taassuma unitsinneqarnissaa kissaatigaarput. Aningaasat inuiaqatigiinnut atorneqartariaqarsoraagut, siulittaasoq oqarpoq.
- Inuit namminiilivinnissaq pillugu oqallittoqarnissaa pisariaqartinngilaat. Aningaasaqarnikkut ineriartortoqarnissaa atugarissaarnerlu pisariaqartinneqarput, Aqqalu Jerimiassen oqarpoq.