Atassut: Nalileeqqittoqartariaqarpoq

Allattoq Mads Lynge
marsip 13-at 2007 10:45

Naalakkersuisooqatigiinni aningaasarsiornikkut politikki nalilersuiffigeqqinneqartariaqartoq naalakkersuisooqatigiinni ilaasortat arlallit isumaqarput, pingaartumillu ilaasortat Atassummeersut.

Angallannermut politikkip nalilersuiffigeqqinneqartariaqarnera kiisalu innaallagissamut imermullu assigiimmik akeqartitsinerup atorunnaarsinneqarnerata kingorna isorliunerusuni eqqugaanerluttoqarnera arajutsisimanngikkitsik Atassutikkut tusagassiuutinut nalunaarumminni pingaarnertut oqariartuutigaat.

Partiip Atassutip siulersuisui inatsisartunilu ilaasortaatitaat sapaatip akunnerup naanerani ataatsimeeqatigiipput, naalakkersuisooqatigiinnermullu isumaqatigiissut naapertorlugu sulisoqartoq oqaatigineqarpoq.

Inatsisartuni ilaasortat amerlanerussuteqartut naalakkersuisooqatigiinnilu ilaasortat arlallit angallannermut politikkip nalilersuiffigeqqinneqartariaqarneranik isumaqartut Finn Karlsen oqarpoq, Atassutip ilaasortaatitaasa akornannit taamaallaat taama isumaqartoqanngitsoq oqaatigalugu.

Pitsaanerusumik atugaqalersimasut ajornerusumik atugaqalernissaat aamma eqqarsaatigineqanngitsoq Finn Karlsenip oqaatigaa:

- Imatut eqqarsanngilagut: Akit assigiikkunnaarnerat tunngavigalugu pitsaanerusumik atugaqalersimasut ajornerusumut utersaaqqitsinnissaat. Aamma naalakkersuisooqatigiinnerup tamakku piinnarlugit innarlerneqarnissaa naatsorsuutiginngilara, Atassutip siulittaasua Finn Karlsen oqarpoq.

Atassutikkut tusagassiuutinut nalunaarutaat pillugu Siumukkut suli ataatsimiissimanngimmata naalakkersuisut siulittaasuat Hans Enoksen oqaaseqarumanngikallarpoq.

Taamatuttaaq naalakkersuisunut ilaasortaq Josef Motzfeldt ullaap tungaa inatsisartuni ulapputeqarmat oqaaseqartissinnaasimanngilarput.