Atassut: Naalakkersuisut tusagassiuuteqarnermut politikkiat tutsuiginanngilaq

Namminersorlutik Oqartussat ingerlataasa nunatsinni annonceliani ikiliserujussuarlugit nunanut allanut nuuppai, nunatsinni annonceliussat tassaalersimallutik, nunani allani annoncelianut innersuussinerit aviisimi inikitsunnguit.

- Kalaallit Nunaanni aviisit taamaalillutik annaasaqarujussuarput, Steen Lynge isumaqarpoq.

- Aviisit nassiunneqartarnerannut tapiissutit aamma peerneqarnerat tapersersornanngilaq, sinerissami aviisisiniartut akisunaarujussuarlugit pisisariaqalissammata, nangippoq.

Atassutip Naalakkersuisut pissusilersornerat tamat oqartussaaqataanerannut killilersuilernerusutut aamma isigaat.

- Aviisinik akisoorsuarnik akissalinnuinnaq aamma qarasaasiakkut internetimut attavilinnuinnaq aviisinik atuartarneq killilerneqassaaq, tamannalu akuerineqarsinnaanngilaq, Atassut isummersorpoq.

KNR-imut aningaasaliissutaasartut 3 millioni koruunit peerlugit tamanit qinnuteqarfigineqarsinnaasumut aningaasaateqarfimmut nuunnissaannik Demokraatit aamma siunnersuinerat Atassutip aamma akerleraa.

- KNR-ip siunissami ineriartornissaanut killiliineruvoq. Aviisinimi allani soraarsitsiortornerit pisut tusartalereerpagut, Steen Lynge oqarpoq.