Atassut: Misissuisitsinissaq suli tapersersorparput

Atassutip siulittaasuata, naalakkersuisunut ilaasortap Finn Karlsenip, Qasigiannguani efterskolissamut atatillugu immikkut aningaasaliissutit pillugit inatsisilerituunik attuumassuteqanngitsunik misissuisitsinissaq suli isumaqatigaa. Naak tamanna Atassutip inatsisartunut ilaasortaatitaasa tamakkerlutik, ilaasortaq ataaseq kisimi pinnani, tamanna akerleralugu tallimanngormat taasigaluartut. Misissuisoqarnissaa tapersersorlugu sooq taasisimannginnersut Finn Karlsenimut apeqqutigaarput.

- Tatiginnikkunnaarnermik taasisitsisoqarneratigut, tamanna unitsinneqarmat, qanoq ingerlateqqinneqassanersoq uanga naluara. Inatsisartut siulittaasoqarfiata imaluunniit kukkunersiuinermut ataatsimiititaliap suliassaq ingerlateqqissaguniuk ingerlateqqissavaa.

- Soorunami tamanna uggornarpoq. Aamma naalakkersuisut siulittaasuat Inatsisartut oqaluttarfiannit tamanna pillugu erseqqissumik oqaaseqarpoq, inatsisilerituunit attuumassuteqanngitsunit nalilersorneqartariaqartoq. Tassami ilumut ajortoqarsimappat, tamanna naalakkersuisunut ilaasortamit attanneqarsinnaanngimmat. Tamanna qulaarlugu paaseqqissaartariaqarparput, Finn Karlsen oqarpoq.

- Kukkunersiuinermut ataatsimiititaliap imaluunniit siulittaasoqarfiup tamanna qanoq piniarneraa suli iluamik paasinngilara.

- Uanga ajorinngeqqissaarpara eqqortumik qulaajaasoqarnissaa. Tassami kukkunersiuisut paasissutissanik toqqorterisoqarsimaneraanerat paaseqqissaartariaqaratsigu. Taamaattumik kukkunersiuinermi ataatsimiititaliami Atassutip, Siumup Inuit Ataqatigiillu misissuisitsinissamik piumasaqaataat tapersersorpakka.

Inatsisartut tallimanngormat ataatsimiinneranni Tommy Marømut tatiginninnginnermik taasisitsisoqarmat, Atassut Tommy Marømik illersuilluni taasivoq, naak Arkalo Abelsenimut tunngatillugu naalakkersuisunut ilaasortatut akisussaassuseqarnermut inatsit innersuussutigalugu tunuartitsereeraluarlutik.

Taamaattorli suliassat taakkua marluk assigiinngilluinnaqqissaartut Finn Karlsenip oqaatigaa.