Atassut marsimi qinersisoqassappat piareersimavoq
Inuit isumaannik misissuinermi kingullermi Atassut piffissami sivisuumi siuariarsimanani siullerpaamik siuariarpoq, siulittaasullu isumalluartup marsimi qinersisoqarnissaanik nalunaaruteqartoqassagaluarpat tamanna qilanaarivaa.
-Maannakkorpiaq kommunimut qinersinissaq apriilip aallartinnerani pisussaq piareersaateqarfigalugu ulapputigaarput, saniatigulli aamma Inatsisartunut qinersinissamut piareersaateqarpugut. Immikkoortortaqarfinnit sassartitassatut siunnersuutinik pitsassuarnik arlalinnik pissarsereerpugut, taamaammat qinersisoqarnissaanut piareersimalluarpugut, Atassutip siulittaasua Gerhardt Petersen knr.gl-imut oqarpoq.
Atassut qinersinermi kingullermi Inatsisartuni pingasunik ilaasortaatitaqalerpoq, kingornali qinersinermi taaguunneqarluartoq Finn Karlsen Atassut qimappaa Siumullu ilaasortaaffigilerlugu. Maanna ilaasortaasut marluusut Sivert Heilmann Knud Kristiansenilu qinigassanngorteqqinniarput, taamatuttaarlu siulittaasoq nammineq. Aammattaaq Steen Lynge partiip Nuummi immikkoortortaqarfianeersoq inatsisartunut ilaasortanngortussatut piukkunneqarpoq.
-Kingullermik qinersisoqarmat angusavut angoqqissinnaassallutigit neriuutigaarput, isumalluarpugullu. Partii pisoqarfioqqilerpoq Nunatsinnillu tamanit tapersersorneqarluarluta malugisinnaavarput. Qassinik ilaasortaatitaqalissanerluta apeqqutaatinnagu sapinngisamik annerpaamik sunniuteqaqataasinnaanissarput anguniarsarissavarput, tamannalu naalakkersuisooqataanikkut pisartoq ilisimaneqareerpoq. IA siornatigut suleqatigilluarnikuuarput, qinigaaffimmilu qaangiutilersumi Siumut illuatungiliuttutut aamma suleqatigilluarsimallutigu. Naalakkersuisunngorumaartussat kikkuussanersut oqaluuserinnginnerini qinersinerup inernera takoqqaalaariartigu, Gerhardt Petersen oqarpoq.