Atassut: KNI pillugu iliuuseqartoqarniarpa?

Inatsisartut suleriaasianni § 36, immikkoortoq 1 naapertorlugu Atassut Naalakkersuisunut apeqquteqarpoq.

- KNI A/S-imi patajaatsumik ingerlatsisoqaqqilernissaa anguniarlugu iliuusissanik qanoq ittunik Naalakkersuisut pilersaaruteqarpat?

Atassutip Inatsisartuni ilaasortaatitai taama aperaat.

- KNI A/S pillugu Inatsisartut peqqussutaata allanngortinneqarnissaa, tassa suliffeqarfissuup annertusarneqarnissaanik pisinnaatitsineq Atassummit akuersaaqataaffigaarput, nunaqarfinnut nioqqutissanik Assartuivik, Arctic Umiaq Linellu nunaqarfinni ilaasunik assartuinera Nuka A/S-ilu KNI-mit tiguneqarniassammata. Kisiannili ukiut marluunngitsulluunniit ingerlareersullu paasinarsivoq aalajangiineq taanna KNI-mut ajorluinnartumik kinguneqalersimasoq. Taamaammat apeqquteqarpugut. Atassutip Inatsisartuni ilaasortaasa aamma paaserusuppaat, ingerlatseqatigiiffinnik marlunnik KNI-p tigusinerata kingunerisaanik ajorluinnartumik ingerlasoqalerneranut sorpiaat pissutaanersut. Aamma Inatsisartut aalajangernerattut Arctic Green Foodimi Assartuivimmilu pigisat nalillit tamarmik tunniunneqarnersut, kiisalu KNI-p aningaaserivinnut qanoq taarsigassarsiaqarnera paaserusullugu.

Atassutip Inatsisartuniititaasa apeqqutaanni quliusuni naggataagut apeqqutigineqarpoq suliffeqarfissuup killiffia ajorluinnartoq tunngavigalugu Assartuivik siulersuisuinut aqutsisuinullu kinguneqartinniarneqarnersoq.