Atassut: Kattussuunneq pinngitsaaliineruvoq!

maajip 09-at 2006 16:28

Kommunit aaqqissuuteqqinneqassappata suli qulaajagassarpassuaqartoq Atassutip ullumi Inatsisartuni oqariartuutigaa. Taakku isumaqarput kommunit kattussuutsinniarneqarnerat ilaatigut pinngitsaaliinertupajaaq taaneqarsinnaasoq.

Atassutip oqaaseqartartua Ellen Christoffersen ilaatigut ima oqarpoq.

- Atassummiit kigaallassimaarnissaq pinngilarput, iluarsartuusseqqinnissamulliuna isumaliutissiissut assorsuaq apeqqusersornartikkipput. Atassut isumaqarpoq nalorninartorpassuarnik suli qulaajagassanik peqartoq, Atassummiillu taakkua qulaajarneqarnissaat Atassummiit ujartorpagut, Ellen Christoffersen oqarpoq.

Taanna aperaarput, Atassut oqaaseqarnermini oqarmat kommunit pinngitsaalillugillusooq suliarinnittoqarsimasoq, tamannalu qanorpiaq isumaqartinneraat.

- Nunarput isorartoorujussuuvoq avinngarusimasorujussuarnilu inissisimasoqarpoq, soorlu Qaanaaq, Illoqqortoormiut Tasiilarlu, taakkua immikkut isiginiarneqarnissaat pingaartilluinnarparput. Kattussuutitsiniarnermimi siunnerfigineqarpoq kommuni ataaseq minnerpaamik 8.000-t missaanni inoqartassasoq, taannalu pinngitsaaliinertut isigaarput! Atassutimmi pingaartippaa kiffaanngissuseq taavalu kommunit akornanni suleqatiginnissinnaassutsimik nammineq piumassusertik naapertorlugu ujartuisinnaanerat aallaavigalugu suliniutit ingerlasariaqarnerat, Ellen Christoffersen oqarpoq.

Siumup oqaaseqartartua Jens Lars Fleischer aperaarput ilumut pinngitsaaliiniartoqarsimanersoq.

- Taamatut isumaqanngilanga massakkut Inatsisartut periarfissamik tunineqarput. Isumalioqatigiissitap saqqummiussaa imartoorujussuuvoq, aamma misissuataaraanni pinngitsaaliiniarnermik inassuteqaammik tunngaveqanngilaq. Tassa massakkut uagut nammineerluta immersorniartussaavarput, taamaattumik sukkut pinngitsaaliiniarnermik imaqarnera takujuminaatsippara, akivoq.

Apereqqipparput qanoq ataatsimiinneq takisooq nalilersinnaaneraa.

- Imartoorujussuarmik soqutiginartumik oqallittoqarpoq, qularnanngitsumik suleriaqqinnissamik isummersuutit assigiinngitsut atorneqarluarsinnaasut naalakkersuisunut tunniussuunneqarput, taama oqarpoq, Siumup oqaaseqartartua Jens Lars Fleischer.