Atassut kalaalinngorsaanermut isumaqataavoq
Namminersornerullutik Oqartussat allaffeqarfiini pisortaanerit, departementchefit, kalaallisut oqaaseqartuunissaat Atassummit isumaqatigineqarpoq tapersersorneqarlunilu, Atassutip siulittaasua Finn Karlsen taama oqarpoq.
Allattoq Elisa Isaksen
decembarip 19-at 2007 05:17
- Tamanna tupinnartortaqanngivippoq, naalakkersuisummi naalakkersuisutut sulinerminni siunnersortissaa qaninnerpaaq tassaavoq allaffeqarfimmi pisortaq, taassumalu kalaallisut oqaaseqartuunissaa piumasaqaataavoq, Finn Karlsen oqarpoq.
Atassutip siulittaasuata Inatsisartut siulittaasoqarfianni allaffimmi pisortaq ullumikkut kalaaliummat ippinnartoqartinngilaa.
Atassut sinnerlugu inatsisartunut ilaasortap Kristian Jeremiassenip Siumup naalakkersuinikkut oqaaseqartartua Lars-Emil Johansen taperserlugu tusagassiuutinut nalunaarummini allappoq, allaffimmi pisortat kisimik kalaallisut oqaaseqartuusariaqanngitsut aammali allaffimmi pisortat allat kalaallisut oqaaseqartuusariaqartut.
