Atassut: -Juulimaaq nunatsinneersuusutut naqissusissaaq!

Atassutip maanna Naalakkersuisunut apeqqutigaa Juullip inuata nunatsinneersuunera naqissuserniarlugu illersorniarlugulu Naalakkersuisut iliuusissamik tigussaasumik pilersaaruteqarnersut.

Atassut apeqquteqaammini tunngavilersuivoq Juullip inuata nunatsinneersuunera nunarsuarmi meeqqat amerlanersaasa upperigaat taamalu allagarpassuit nunatsinnut ingerlatinneqartaqisut. Taamatuttaaq ukiuni arlalippassuarni Juullip inua nunatsinneersutut oqaatigineqartaraluarluni inissisimatinneqarnera nalornissutigineqartualersimasoq, taamalu ukiut tamaasa meeqqat allakkaluartut juullip inuanit akineqarsinnaassanersut nalornissutigineqartualersimalluni. Tamakkulu ilaatigut tunngavigalugit maanna tassa Atassut Naalakkersuisunut aperivoq Juullip inua nunatsinneersuunerarlugu naqissusiillutik iliuusissamik pilersaaruteqarnersut.

Atassutip assersuutitut sanilliuppaa Juullip inua Finlandimeersuunerarlugu nunarsuarmioqatigiillu taamatut eqqarsalersinniarlugit Finlandimi pisortat tapiissuteqartarnerisigut Finlandimi juullimut inugitinneqartoq ajunnginnerpaamik atugassaqartitaalluni ingerlasoq.

Atassut isumaqarpoq nunatsinni Juullip inuata aningaasatigut maannatut inissisimatinneqarnera kalaallit avammut kiinnernerannut iluaqutaanngitsoq, taamaammallu naalakkersuinikkut iliuuseqartoqartariaqartoq.